A kan kilvengtu Vancung mi hna puai

OCTOBER 2

ZOHKHENHTU VANCUNGMI HNA

          Greek holhin Setamanan timi Vanmi hna cu Pathian nih a hleikhun in fimnak, thazaang `hawnnak he a tlingmi in a sermi thlarau thiang ha an si. An `uanvo cu Pathian rianh awk le minung zohkhenh ding kha a si. Pum an ngei lo caah caan le hmun tlaihkhinhnak in an luat. A thi kho lo mi zungzal thlarau an si. Cu lengah nu/pa ti an um lo. (Mk 13:25) ningin cun “Mikip nih hin kannih khamhawk ca le Pathian hmaiah remhnak serpiak dingah zohkhenhtu Vancungmi pakhat cio kan ngei dih”. Jesuh hrimhrim nih Vancungmi an umnak kong a fehter kha (Mt; 18:10) ah kan hmuh.

          Cucaah a thiangmi kan nu Bupi nih kanmah a kan zohkhenhtu Vancungmi an um kha a kan cawnpiak. Kum fatein Oct. 2 ni hi zohkhenhtu Vancungmi puai ni ah ri a khiah. Hihi Pa thian duhnak a si maw? Bible he aa ralkah maw? Catholic cawnpiaknak poah hi Bible he aa ralkah mi an um lo. Cucaah zohkhenhtu Vancungmi an um taktaknak kong, le annih nih tlanh mi minungkha an zohkhenh i minung zong nih upat ve ding an sinak kong kha Bible chirchanh in chim ka duh.

1.  Hebrew; 1:14 ah “Vancungmi cu Pathian rian a `uatu, khamhnak a hmu hngami hna bawmh awk ah Pathian nih a thlahmi kh an si” tiah fiang tein a chm. Pathian nih Vancungmi kha a mi hna lamhruai dingin a thlah hna tiah Bible hlun chungahkan hmuh khawh.
2. Exodus; 23:20-23 kan zoh tikah, “Lampi i nanmah an hupphengtu hna le ka timh mi ram i an luhpitu hna ah Vancungmi pakhat ka thlah lai. Amah chimmi kha ngai ulaw a chimmi kha zul u. Amah cu keimah minin rian a `uanmi a si caah rak doh hlah u; cu bantuk palhnak cu an ngaihthiam kho hna lai lo. Asinain amah bia kha nan ngaih i ka chimmi vialte kha nan tuah ahcun nan ral kha keimah nih kan doh piak hna lai i an dotu hna a dohtu kha ka si lai. Ka Vancungmi kha nan hmai ah a kal lai i na duhnak ah an hruai lai,” tiah Pathian nih a ti.
3. Salm: 91:1-2 ahcun, “Na kalnak kipah nangmah zohkhenhtu dingah Pathian nih a Vancungmi kha a chiah hna lai. An kut in an in dawmh lai i lungah na ke kha naa khawng lai lo,” a ti mi kan hmuh.
4. Tobiah; 12:12-14 ah kan hmuhmi cu;- Vancungmi Raphael nih a chimmi cu, “Nangmah Tobiah le Sarah nih thla nan cam tikah nan thlacamnak kha Pa Pathian sinah an chimhpiaktu cu keimah hi ka si… Nang cu, cu ni ah zanriah ei loin tlaipi lo ah na tho i mithi kha na vui tik hna zongah nangmah hlathlai dingin Pathian nih keimah kha a ka thlah. Cun, nangmah le na monu Sarah kha dam tiangin thlopbul ding zongah Pathian nih a ka thlah,” tiah a ti `han ti a si.
5. Matthai; 18:10 ah kan hmuh rih mi cu;- Jesuh Khrih nih “Hi ngakchia tete hi pakhat hmanh hmanh zawmtaih hna hla uh; annih a vengtu hna an Vancungmi kha Vancung khua ah ka pa hmaika ah an um zungzal ko,” tiah a ti.

Khamh hngami hna zohkhenhtu Vancungmi an um lo ahcun Jesuh nih “an Vancungmi” a ti hnga lo. Hihi Jesuh cawnpiak mi a si. Cucaah Bupi nih a tanglei thlacamnak hi a kan cawnpiak i kannih Khrihfa mi nih zing- chun- zan in kan cam lengmang mi hi a si. Cu thlacamnak cu; “Maw a `ha Vancungmi, keimah zohkhenhtu ah Pathian nih a chiah mi, ka ceuter in ka veng law, ka hruai in ka peng ko, chun nitlak in zan khua dei tiang… Amen!” ti a si.

Hi thlacamnak hi a cunglei Bible cang hna a fehter mi thlacamnak a si caah kannih dihlak nih cam peng hna usih. Khrihfa aa timi, a simi poah nih zohkhenhtu Vancungmi pakhat kan ngei cio ti philh hlah usih.

A ngaitu nan dihlak cungah zohkhenhtu Vancungmi nih lam in hruai cio hna seh. Amen!