Mithiang Augustine

28^th August

ST.AUGUSTINE  (354-438)

(BISHOP & DOCTOR)

 Hippo khua Bishop a simi mithiang Augustine cu kum (354) ah, Chaklei Africa continent ummi Thagaste khua ah a chuak. A nu nih thlacampiak len ko hmanhsehlaw a pa i zumtu ralchanhtu zumhnak kha a cohlanmi a si i cuti cun a tthangmi a si. Kum (17) a ti ah Cartage khua ah a kal i cuka ahcun Manichean an timi zumtu ralchanhtu bu ah a lut. Amah cu ziachiat nunnak in a rak tthang i fa pakhat a rak ngei. Kum (29) a ti ah Italy ah a kal. Cu ka ahcun amah cu Milan khua Bishop St. Anbroose chimhrimnak kha a rak upat. Nikhat cu an innpa ngakchia hlasak aw kha a theih.

Cu tikah a pawng i a ummi Bible kha a kau i St. Paul `ialmi Bible caang pakhat kha a rel. A hmuhmi cu “Bawi Jesuh zia tu kha i lak u law pumsa duhnak tuah kha ngol u,” (Rom 13:14) ti a si. Hi Bible caang nih hin a hnubik ahcun Khrih sinah a lung a thlentertu a rak si. Kum (32) a ti ah kum (387) Paschal (thawh`han) lai a nizan ah St. Anbroose kut in tipilnak a in. Cu nithawk in a nunnak chanchung vialte Pathian sinah i pekchanh awkah bia aa kam. Amah nih a vuankhan i a chi mi cauk ah “Hlan a chanchan lawng siloin zungzal a `hami maw Bawipa nangmah kha caan a luan hnuah ka rak in dawt” tiah a `ial.

Kum (395) ah Hippo khua Bishop an pek i Tuukhal `habik le ca`ail thiamsang sinak a langh ter. Amah cu Siangbawi bu kha a ser i Sister bu chungluh nu hna caah a laarmi cawnnak ning upadi a `ialpiak hna. Anih cu mipi kha “nanmah caah Bishop pakhat ka si” asinain, nanmah he Khrihfa pakhat ka si ve tiah a rak ti hna. Nikhat cu thumkomh Pathian kong a ruah lioah rili ti kha thetse khor a cawhnak ah a kut in ti a than liomi khuaruahhar ngakchia pa kha a hmuh. Ngakchiapa i a thil tuahmi hi a si kho lailo a ti tikah ngakchiapa nih “Na thluak in Pathian si cannak theihkhawhnak nakin rili ti vialte kha khorah thandih kha a fawi deuh” tiah a rak ti.

AD 400, Rome Empire a tlak hnuah “Pathian Pennak” timi cauk a `ial, Rome Empire a tlaknak cu Khrihfa sualnak ruangah siloin amah `hatlonak le sual ruangah Pathian nih dan a tatmi a si tiah a rak `ial. Hi tluk a thiammi Bishop pa cu kum (430) ah a umnak khua kha Vande miphun nih an kharkhumh i an tuk hna lioah a thi.