Mithiang Camillus

July, 14

ST.CAMILLUS (1550-1614)

            Sizung hna a zohkhenhtu mithiang Camillus cu 1550 kum ah Italy ram Chieti khua ah a chuak. A ngakchiat tein ralkap ah a lut i `hatlonak a tuah mi pakhat a rak si. Kum 25 a ti ah tangka in lente celhnak a tuah ruangah a ngeih mi thilri pakhat hmanh tang loin a rak um caah Manfredomia i a um mi Kapuchin Zateik biakinn ah rian a `uan. Mah biakinn i a uktu Siangbawi i forhfialnak hna cu a thinlung a suk i a hnu ahcun Pathian sinah a pum aa pek. Kapuchin Zateik Sianginn ah luh a duh ko nain a ke i a ngeih mi zawtnak ruangah a lut kho lo. Cucaah `ihnung a si mi Rome khua i a um mi Sangiegomo siizung ah a rak kal.

            Zawnruahnak a ngei lo mi siizung rian`uantu hna cu mizaw tampi kha an mihring bakin an vui hna. Mah bantuk thil a can lioah khan Camillus cu dawtnak le zaangfahnak nganpi he mizaw hna kha a chungkhat bantuk tein a zohkhenh hna caah siizung pi i uktu rian an pek. Siangbawi ordination a lak hnuah Camillus cu siizung hna kha zohkhenh awkah bu pakhat a ser. Camillus ti mi cu bu i chungtel hna cu a dam lo mi hna kha Jesuh Khrih pum bantuk ruahnak he an zohkhenh hna.

            Camillus cu “hi vawlei cungah sifak rethei mi an um lo a si ahcun vawlei tangah nan va kawl lai i nan khamh hna lai” tiah a mi hna kha a ti hna. 1588 kum ahcun chungtel a cheu hna cu Nepal rili kam a lenglei i a um mi chawnh fawi zawtnak a ngei mi hna, tilawng cungah an ve kal i bawmhnak rian kha an va `uan. Mah rian an `uannak ah zawtnak nih a chawnh hna i a thi mi an chungtel pahnih hna kha an bu chung i a hmasabik martyrs ah an chiah hna. Mithiang Camillus cu 1614 kum ah Rome khua ah a thi i Pope Leo XIII nih Camillus kha midam lomi hna a zohkhenhtu tiah a thanh.