Mithiang Margaret le Mithiang Gertrude

Mithiang Margaret le Mithiang St.Gertrude

November 16

ST. MARGARET OF SCOTLAND  (1046-1093) le ST. GERTRUDE  (1256-1301)

Scotland zohkhenhtu mithiang Margaret cu 1046 kum Hungary ramah a chuak. Norman ralkap hna nih an rakfuh ahkhan Margaret cu Scotland ah a zam. Kum 24 a siah Siangpahrang Malcom III he leh an i thah i fanu/pa pa 8 an ngei. Zohchunhtlak nu pakhat a sinak le a tlingmi Siangpahrang nu a sinak a rak langhter khawh. Dawtnak le mithmai `hatnak in a va Siangpahrang thinhunnak kha a daihter ton bantukin amah kha dinfelnak le dawtnak rian`uan awk a forhfial khawh.

 Siangbawi hna thlarau lei thar`hannak kha a `hanghter bantukin zarhni, puai sunglawi ni hna ulhawk hna kha `uanvo ah a rak tuahkhawh. Biakinn tampi kha a rak sak. Biaknaklei i a herhmi hna kha bomh dingin lungthin thiang Nubu kha a rak tuah. Halvaakmi hna cu Margaret sinin an lawngin an kir ti a um bal lo.A thei zong kan thei bal lo. Margaret cu 1093 kum ah a thi i amah pumpak nih a rak sakmi Dumfermline Biakinn (Church of Dumfermline) ah an vui.

St.Gertrude: Thlanglei le Chaklei America karlak i a ummi nitlak India tikulhbu hna zohkhenhtu St. Gertrude cu 1256 kum, Germany ram Eilsleben ah a chuak. A hmettein Cistercian convent, Sister Sianginn ah a rak um i cauk le Philosophy lei ah khan a rak cawndeuh. Kum 26 asiah pakhat a min a thantermi biathlam (langhnak) a rak hmuh. A it i a hngilhlaite ah khan a sinah Jesuh a raklangh i “Ka sinah rak kir `han, Keimah i nuamhnak cu na caah mitsur zu bantuk duhnung a site lai” tiah a rak chimh.

Cu hnuah biaknaklei he aa pehtlai lomi cawnnak le relnak hna kha a hlawt i Bible le Bupi i Pa le hna sinah a rak i mer `han. Mithiang St. Gertrude cu St. Mechtildis i lam hmuhsaknak tangah thlacamnak le daitein thlacam nunnak tlamtlin nak kha a kawl. Voikhatnak langhnak a hmuhter hnu zongah Bawipa thisa a cohlan caanah Bawipa Jesuh cu mah nu sinah a rak leng`han tawn.

Nawlpekmi vialte le khuaruahhar hmuhtonnak vialte kha Gertrude Biathlam (The Revelation of Gertrude) tiah mi nih an theihmi “Pathian zaangfah dawtnak lamkaltu” timi ( Herald of God’s Loving Kindness) cauk ah a dihlakin a rak `ial. Bawipa Jesuh he Thlarau lehthahnak kong le lungthin thiang upatpek a herhnak zong kha a rak `ial.Voitam piin alu kha Bawipa Jesuh `ang cungah a ihter i Bawipa Jesuh thinlung tor thawng a theihnak kong tette a rak khaan colh. St. Gertrude cu 1301 kum, amah kum 45 a ti ah a rak thi.

Add new comment

6 + 1 =