Mithiang Mary Magdalene

July, 22

ST. MARY MAGDALENE (kum zabu 1) 

            Mithiang Maria Madalena cu Martha le Lazaruh hna i an nau a si i sualtuahnak in a min a rak thang mi, khuachia pa 7 nih an tlak mi asi. (Lk; 8:2) Judah khua Bethany khuate in a sinain Galile um Magdala ah a zia aa thlen hnu ah Magdalena tiah minih an theih mi a si.

 Jesuh nih Farasi pakhat a si mi Simon inn ah zanriah a ei lioah Maria nih Jesuh ke kha a mit thli in a ttawlpiak i Zihmui a toihpiak. Mah tuahsernak cu Simon caah intuar khawhnak nakin a lonh deuh nain Jesuh nih “Mahnak i a sualnak tampi kha a ngeihthiam caah tampi in kan dawt” tiah a rak ti. Cu hnu thawkin Maria cu Bawi Jesuh zultu hna caah a herhbaumi a `tt nubu ah a tel ve. Nikhat cu Jesuh nih Bethany i Lezaruh inn ah a va len tikah Maria cu inn rian`uanlo in Jesuh kehram ah a tthu i a bia kha a ngaih caah a u nu Martha nih Bawi Jesuh sinah a chim.

 Asinain Bawi Jesuh nih, “Martha, Martha, nangcu zeizong thil kongah na thin a phang. A herh mi cu pakhat lawng a si. Maria tu nih cun thilttha kha aa thim cang. Mah thil cu ahohmanh nih an chut kho ti lai lo” tiah a ti. (Lk; 10:41-42) .Harsatnak a in lai niruk (6) aa duh ah khan Jesuh cu Bethany khua Lazaruh inn ah a va leng i Maria Magdelena nih a ke kha Naaduh zihmui in a toihtthan. Judah Isakariot cu mah bantuk a man a fak mi zihmuih a lak a siter kha a ing kho lo i, “Mah zihmui kha zuar in mi sifak hna kha pek ah a ttha deuh lo maw?” tiah a rak ti.

 Asinain Jesuh nih “Amah cu hnahnawhnak pe hlah u, ka ruak vui ni caah a ngeih mi cu i chiah ko seh. Mi sifak cu nan sinah an um zungzal ko lai, Kei cu nan sinah ka um zungzal lai lo” tiah ati. (Jn; 12:7-8) Ni sarihnak a nikhat ni zingka ah Maria Madelena le a dang nu hna he ruak um loin a lawng mi thlankhor kha an va hmuh. Cu tikah Vancung mi pahnih nih “mithi umnak ah a nung mi kha zeicahdah nan kawl” Amah cu hika ah a um ti lo, A tho `han cang” tiah an rak chimh hna. Cu hnu ahcun Jesuh nih Maria sinah a lang i “Maw Minu zeicahdah na ttah?” tiah a hal.

 Amah nih cun Dum hngaktu nih a ka hal tiah a ruah caah ka Bawipa ruak kha khoika ah an chiah tiah a hal. Jesuh nih a min in a vun auh tik lawngah Jesuh a si kha a hngalh i a kuh. Jesuh nih “Keimah kha ka kup rih hlah, Kei cu ka Pa sin ah ka kal rih lo. Ka unau hna sinah vakal hmasa law ka Pa a si mi nannih nan pa, Ka Pathian a simi nannih nan Pathian sinah ka kal lai nak kong kha va chimh rih hna” tiah a ti. (Jn; 20:11-18)