Mithiang Nicholas le Santa Claus pehtlaihnak

Santa Claus ( Christmas Siangbawipa)
Christmas laksawng a phawzam tawnmi minthang Santa Claus tiah minih an theihmi Mithiang Nicholas cu kum zabu pali ah Asia minor i Patara khua ah a chuak. Turkey ram Myra ukchung Bishop sinak in ṭuanvo pek a rak si. A si a faktuk caah va a ngei kho lomi a fanu pathum kha a cawm khawh ti hna lo i a hlawhhlang ṭuanter dingah an nu nih bia a khiah mi kong kha Nicholas nih a theih tikah Sui songkhuai pakhat aa put hnuah muilakah aa phen i a awngmi thlalang awng in inn chungah a hlonhpiak hna. Cu sui songkhuai in a u upabik nu ṭhitum puai caah a chiah khawh i a upabik nu zong a rauh hlanah va a ngei (ṭhit umhnak puai) a tuah kho. Cu caan karlakah Nicholas cu a pahnihnak le pathumnak fanu hna caah a hlan bantukin sui songkhuai hlonhpiaknak in a rak bawmh ve hna. Ahnubik nak ahcun cuti a tuahmi kha a thlithup in a bihmi a pa nih anmah chungkhar a bawmtu pa cu Bishop Nicholas asi kha a theih i a cungah tampi lawmhnak a rak ngei.
Mithiang Bishop Nicholas cu 350 kum ah rak thicang ko hmanhseh law mizawn a ruahnak le a siannak lungthin cu a nung pengko i vawleicung ah a min a rakthang. Kum zabu 19 chung, Dutch miphun Protestant cheukhat hna cu Bishop Nicholas min he aa khat tein Santa Claus tiah an rak sak. Amah kha mi nuamhthiam, minthang, mi nih an uar ngaimi Christmas laksawng phawtzamhtu a si tiah an rak fehter. A senmi a Angkifual kha Bishop aa khuh mi Docha le angki bantawi ah a raangmi Tuuhmul he ṭhatein an betpiak. Poland nitlaklei hmun i a ummi Sazuk nganpi hna le Bishop Nicholas bu cu mei khutnak tungpar in a ṭum i Christmas thingkung karlak hna ah laksawng a thlaipiak tawn hna nakin American caṭial thiam saya hna kutṭial ah a langkhun i a min a thang ngaingai. Santa Claus cu Christmas thlum alnak taktak a si i vawleicung misifak hna cungah Dawtnak le peksiannak ngeih nak sullam kha a ngeih ter.