Mithiang Peter Chanel

April, 28 ST. PETER CHANEL (1803-1841) (Siangbawi le Martyr) Oceania tikulh bu in pakhatnak martyr a simi St. Peter Chanel cu 1803 kum France ram, Kuez khua ah a chuak. Amah kha Siangbawi cannak Sianginn ah a rak thlahmi khuahlum Siangbawi Appa Trumpia nih a fimthiamnak le Pathian lei azumhnak kha a rak hngalh. Amah cu Bishop pa i upat peknak kha a rak hmu i Bishop nih hitin a rak ti, “Peter Chanel cu ngakchia bantuk in zumhnak a ngei i vanmi pakhat bantukin a nung i a ummi a si,” tiah a rak ti. Siangbawi cannak a lak hnu ah leithuang hna hmun a simi Crozet Diocese ah kumthum chung Pathian rian`uan ding in rian an rak khinh. Cu Diocese ah Biaknak le `hancho dingin a rak `uan. Zeitin a va sihmenh ah Biaknak rian ah lungtho tein a rak `uan i 1831 kum ah ram dang lei mission a `uanmi Maris phu ah a rak lut. 1836 kum ah Jesuh Khrih kong kha voikhatte hmenh a thei bal rih lomi Pacific rili chung i Muthuna tikulh ah umhmun a khuar i mission rian a rak `uan.

Cu tikulh i khua a sami hna holh kha a cawng i mizaw hna thlopbul nak in cu rammi hna zumhnak kha a lak hnu ah mi tampi kha Bupi chungah a rak lutter hna. Phungchimnak in Mutuna tikulh i hruaitu hna nih an rak `ihzah, tha an pekmi khuachia biaknak kha a rak hrawh. Tikulh i hruaitu hna nih an miphun hna cu anmah uknak upadi tang lawngah chiah dingin khuahrum biaknak kha tha an rak pek. 1841 kum ah cu tikulh i hruaitu hna nih an ralkap kha an rak thlah i cu ralkap hna nih cun Peter Chanel kha Hreitlung in an rak thah. Biatak caah thahnak a rak in hlan a hmai nikhat ah St. Peter Chanel nih “Ka thih zongah zei a poi lo. Hi tikulh ah thukpi in hram a bunh cangmi Khrih zumhnak thawng`ha cu ka thih ruangah a rawk lai lo,” tiah a rak chim. St. Peter Chanel a thih hnu kum tlawmpal a rauh ah tikulh um dihlak cu Jesuh Khrihfa ah an rak cang dih.