Mithiang Peter Siangpahrang Thutdan Puai

            Lamkaltu St. Peter i Siangpahrang ṭthutdan puai cu kum zabu pa (4) thawk tein an rak tuah hmasabik ṭthutdan hmelchunhnak cu a biapittuk caah Pope a ṭthutnak kha a thiangmi ṭthutdan (Holy Chair) tiah sullam a ngei mi “Pope hmunpi” (Holy See) tiah an auh. St. Peter Siangpahrang ṭthutdan cu Bupi (Khrihfa vialte) cungah Pope cawnpiaknak nawl kha a langh termi a si. Pope cu Bupi chung um Khrihfa vialte sinah zumhnak kong a cawnpiak tik hna ah “Siangpahrang ṭthutdan in” (From the Chair) a cawnpiak kan ti khawh.

            22 February cu Rome khua ah Bishop rian a ṭtuan hmasa ni a si. Hlanlio pupa hna cawnpiak ningin le tette ningin Missa an tuah tikah St. Peter nih a rak hman mi lungphel ṭthutdan cu St. Peter Biakinn a cungbik (Biakinn par) i thlapa cheu pungsan a khan pakhat ah an khumh i an tuamchih tiah kan theih.

            Khrih pumpak hrimhrim nih St. Peter kha amah a changtu hna a changchang in cawnpiak chinnak nawl a rak pek. Galilee rili kam ah Jesuh nih (Mt. 16:18-19) ah “Nangcu lungtum, Peter na si, kan ti. Cun hi lungpi cungah hin ka Khrihfa bu hram ka bunh lai i cucu thihnak hmanh nih a tei kho lai lo. Vancung Pennak hunnak tawhfung zong cu kan pek lai i vawlei cung i na hrenh mi cu Vancung zongah hrenh a si lai i vawlei cung i na awnh mi cu vancung zongah awnh a si lai,” tiah a rak ti. Mithiang Peter bantukin vawlei cung i Pope (266) hna cu mithiang Peter i Siangpahrang ṭthutdan cungah an rak ṭthu i zumhnak le tuahnak hna cawnpiaknak ah zeitik hmanh ah an rak palh bal lo.