Mithiang Philip le James

3^rd May

ST. PHILIP LE ST. JAMES (LAMKALTU HNA)

(Kum zabu pakhatnak)

            Khrih zultu a si mi hna mithiang Philip le mithiang James hna i puai ni kha (563) kum, Rome khua i a ummi Biakinn kha mah mithiang hna kut ah an pekchanhnak ni thawkin fonhchih in an tuah. Mithiang Philip cu Galilee ram `then Bethsaida pengmi a si i tipil petu John (John Baptista) i a hnuzul a si. Jesuh Khrih nih a hnuzulh dingah a auh hnu ah, amah cu mi khamhtu Messiah cu ka hmuh cang tiah Nathanael kha a thanhtu a si. Asinain amah cu Nazareth timi khua hmete in thil`tha pakhatkhat a chuak kho taktak hnga maw tiah a lung a hring. Cucaah mithiang Philip nih “Ra law rak zoh hen” tiah a rak phit (John 1:43-46). Mipi kha changreu a pek hna lioah khan Philip nih “Tlawmte cio ei ding hmanh ah tangka zahnih leng a herh lai,” tiah a ti (Jn. 6:7). A hnubik zanriah an dum `ti lio ahkhan amah cu Pa Pathian kha kan hmuhsak tuah tiah a titu kha a si (Jn. 14:8). Philip nih khan, “Bawipa, na Pa cu kan hmuhsak law cu vial cu kan herhmi a si ko,” tiah a ti. “Nan sinah saupi ka um ko cang, a sinain na ka hngal rih lo maw Philip? Keimah a ka hmutu nih cun ka Pa kha an hmuh ve ko” tiah Jesuh nih a leh (Jn 14:8-9). An chuah kehnak phung bangin Asia maina ah Fricia he Hiresiapolic ah thawng`tha bia a chim i mahka ahcun vailam an tah i an thah.

            Mithiang James (asiloah) ngakchiapa cu Alfeas i fapa a si. Amah cu Jesuh he chungkhat silo, unau an si (Mathai 13:55). Amah cu Jerusalem Bupi ah a hmasabik Bishop a si i Johan cathiang kha a `tialtu a si. AD 49 kum, Jerusalem Siangbawi te meeting ah Khrihfa zumhnak kha a pom ve i Khrihfa ah a rak lut mi Judah miphun a si lomi (Jential mi) hna cu cuarpar tan a herh lo tiah Bupi biachahnak kha mithiang James nih a thanh (Lamkaltu 15:19). Mithiang James cu Pathian le biatak kha a tlaihchan tukmi a si caah amah kha “Biaknak lei a hmun mi pa” tiah an auh. Caesarea in tuanbia lei thiamsang Eusebius nih “Mithiang James cu cat loin thla a cam tawn caah a khuk cu kalauk pakhat i a khuk bantukin a hak cang” tiah a rak ti. Hlan phung zumhnak bantukin Bawi Jesuh cu mi khamhtu Messiah a si tiah tehte khan in a chim caah AD 62 kum ah Biakinn cungbik dothlei cung in tla lakin lungin an cheh i an thah an ti. A thih lai teah a mit in van a cuanh “Maw… ka Bawipa Pathian, Ka Pa, na fapa toidornak in zaangfah kan nawl ko. Annih hi zeidah kan tuah ti an i hngalh lo caah annih kha rak ngaithiam ko hna,” tiah a ti.