Mithiang Teresa

          Mission rian`uan hna zohkhenhtu Mithiang Theresa cu January 2, 1873 kum France ram, Alancon khua ah Louis le Zelie Martin nih an rak ngeihmi fanu hniangbik a si. Amah cu a ngakchiat lio tein mi damlo ngai mi a si caah `ha deuhin zohkhenh le conghramh a rak hau mi a si. A kum 4 a si lioah a nu nih a rak thihtak hna i Theresa cu a pale a ule nih an rak zohkhenh. A ngakchiat tein zeizongte ngeihduhnak lungput a rak keng mi a si.

          Kum 14 a rak si lio, 1886 kum Christmas lai zaanah Nunnemmi Bawhte Jesuh i a thuk ngai mi langhnak a hmuh hnuah nunthlennak a rak ngei i cuhnu in cun amah pakhat nuamhnak kha ruat loin a nunnak le a thazaang cu dawtnak in a hmaan. Kum 15 a si ah Lisieux khua ah a um mi Carmelite Convent ah Pope i ahleikhun nawlpeknak (Popal dispensation) in a lut i a nunnak dihlak cu Pathian sinah aa pekchanh. Amin ah “Athianghlim mi Mithmai le Naute Jesuh i Sister Theresa” tiah aa sak. St. Theresa a tlaihtleng cu “Duhdawtnak lawnglawngin pum i pek khawh a si” ti mi a si.

          Sister Sianginn ah a rak um lioah a hleikhun in thil a tuah mi a um lem lo. Nifate a ttuan ding, a ttuanvo lawng kha a `hakhun le felfai tein a rak ttuan. A thlithup in thilttha tuahnak le thlacam nunngeih in a caan cu a rak hmang i Pathian he pehtlaihnak ttha tein a rak ngei. Zawtfahnak, ttih phannak, harsatnak vialte lakah Pathian cu fek tein aa tlaih i Pathian zaangfah dawtnak chungah fek tein a rak nung. Sister can a duhmi hna zohkhenhtu (Novice Mistress) lubik ttuanvo an khinh tik zongah Sister can a duh mi hna kha tangdornak le thianhlimnak ngeih dingin a kaa in siseh, umtu ziaza in siseh tette langhter in a rak cawnpiak hna. Amah ttial mi “The History of a (Soul)” timi cauk in vawleipi nih Theresa cu theihhngalh a hun si. Thlarau lei he aa pehtlai in, a rak ttial mi catlang pakhat cu “Nunnak ah a biapi mi cu thil lianngan tuah khi asilo, dawtnak nganpi ngeih tu khi a si” a ti i a dang pakhat cu “Keimah cu Pathian kha thil hmepacik tein aa pechan khomi zei santlailo thlarau fate ka si” a ti rih.

          Biaknak caah thihnak a ingmi martar pakhat dirhmun in thih duhnak lungthin a  ngeihmi a fak tuk caah a nunnak kha thlarau hna khamh khawhnak in Bupi karhchin dingah aa pekchanh. A rak chimmi cu “Keimah cu mithiang St. Agnes i hmelchunhnak bangin ka si khawh chungin hmuh ka duh” tiah a ti. Cu thil cu khuaruahnak thluakin a si kho lomi dawtnak in a siter lai ti a si. Theresa nih Thlarau lei ah a thawnnak pakhat cu thil Dawhte thil sawhsawh kha dawtnak in tuah kha a si. Theresa cu Pangpar a duh tuk mi a si i amah le amah zong khi Pathian dumchung pangpar dang hna lakah Pathian sunparnak a langhtermi aa dawhmi pangpar fate ka si tiah aa hmuh.

          TB zawtnak in caan saupi nganfah a tuar hnu, September 30, 1897 kum 24 a si ah a thi. A thih hlanah a donghnakbia a chim mi cu “Ka Pathian, kan dawt” ti hi a si. Thawng`habia karhnak mission rian ttuannak ah Thlacamnak le tuahsernak hna cu hmunkhat in khat le khat aa pehtlaihnak kong langhternak caah St. Francis Xavier bantukin ramdang lei mission rian`uantu hna zohkhenhtu tiin 1927 kum ah an fehter. Cun Minung tampi sinah Vancung ram in a tthawnnak le a rian ttuannak a langh tikah May 17, 1925 ah Pope Pius XI nih mithiang sinak a pek i 1997 ah Pope John Paul II nih Doctor of the Church sinak a thanh.