Mithtag Catherine

April, 29
ST. CATHERINE OF SIENA (1347-1380)
(Ngaknu thiang le Bible saya)
    Mithiang nu tlawmte hna chungin Bupi nih Bible thiam saya pakhat tiin a fehter mi St. Catherine cu 1347 kum Italy ram, Ceazana khua i mirum chungkhar in a chuakmi a si. Kum (6) a si ah Bawipa Jesuh kha langhnak in a rak hmuh i a nunnak kha Pathian sinah a pekchanh. Kum (12) a tlin tikah zeitikhmanh ah va ka ngei lai lo tiah a nu le a pa lungfian nak caah aa dawh ngaimi a sam kha a rak tan dih. (a lu aa kongh) 1365 kum ah St. Dominic i dotthumnak Sister bu ah a rak lut i a inn ah rawlulhnak le thlacamnak lawngin a rak um. Amah cu atu le atu in khuachia tukforhnak le lungrawhnak a rak tong. Nikhat cu, “Maw … Bawipa Pathian ka thinlung thlarau cu tukforhnak a tong i sifah ka in caan ah Bawipa khoika hen na um?” tiah a au i a hram. Bawipa nih, “Ka fanu, keimah cu na thinlung chungah kaa thup i ka vel in thazaang kan pek ko,” tiah a rak leh.
    1366 kum ah Ceazana khua ah nuamhnak puai an tuah lio, amah cu a khaan chungah thla a cam lio ah Jesuh Khrih cu a nu Mary he Vanmi hna kulh in a sinah a rak lang. Nu Mary nih Catherine kut kha a lak i Jesuh sin ah a pek. Jesuh nih kutdong hrolh a hruk piak I a pom hnu ah a thawhter. Hi thlarau lehthah puai cu Catherine i mitheih Pathian rian‘uannak caah a dongh hmelchunhnak a si.
    Catherine cu mizaw hna le thongtlami hna kha rak zohkhenh hna. Asinain a zum sualmi, aa hruhchihmi, mi‘ha bantuk aa um termi a si tiah sual an puh. 1375 kum, Visa khua Christna Biakinn chungah thla a cam lio ah Jesuh Khrih sin in hma hna kha a rak ngei ve. A thianhlim nak thawngin amah a rak ralmi hna le an rak i theithiam lomi hna caah biachah piak dingin an rak auh tawn. 
    1376 kum ah Rome khuapi in kum (74) tiang a rak chuaktak cangmi Pope Grogory (11) kha Rome khua lei kir‘han dingah forhfial dingin France ram Avisden khua lei ah a rak kal. A tangmi a nunnak kha Dialogue timi cauk ‘ialnak in caan a hman. Cucauk cu Thiang thlarau nih fimpeknak tangah a rak ‘ial. Cun rel awk a ‘ha ngaimi cazual (400) tluk zong a rak ‘ial rih.
    Cu ca hna cu muidawhnak le thlarau lei caah a hleikhun in a ‘hami cauk an si. Catherine cu upat hmaizahnak, langhangnak le mikomh thiamnak hna in a hleikhun mi nunzia kha a rak langhter. Pope nih vawlei pumpi he pehtlai in Bupi hruaitu sinak in a rian‘uannak cungah ralrin nak a rat caan ah Catherine nih Pope kha “Ka dawt PaPa” tiah a rak ti. A pum kha Bupi caah thawinak sa ah a rakchanh hnu ah kum (33) a tlin tikah Bawipa Jesuh sin ah lungdai tein a rak i din.