ST. JOHN MARY VIANNEY (1786-1859)

4^th August

ST. JOHN MARY VIANNEY (1786-1859)

(SIANGBAWI)

Mithiang John Vianney cu Siangbawi hna zohkhenhtu mithiang a si. 1786 kum May 8 ah France ram Dardily khua i sifak chungkhar in a chuak. Kum 20 a ti ah Lyons khua Seminary Sianginn ­­ah a lut. Asinain Philosophy le Bible lei cawnnak ah khan aa harh ngai. An Sianginn uktu (sayaci) nih amah kha Sianginn chuah dingah a ruahnak a hal tikah Vianney nih “Bupi nih a fimthiam mi Siangbawi hna a herh hna lawng siloin a thianghlim mi hna zong kha a herh ve hna” tiah a leh. 

1815 kum ah Siangbawi caannak a lak hnuah John Vianney cu minung 230 lawng an um i lamhlapi khuate pakhat a si mi Ars pengah Siangbawi a ṭuan. Amah cu semrel ngaiin rawl-ulhnak kha a tuah i amah sinah a rami sual a thlahmi hna sual thlahpiaknak kha amah pumpak nih voitampi a tuahpiak hna. Sual thlahpiaktu Siangbawi pakhat a si tiah minthannak le lungthin tharau tlaihkhawhnak, a ṭhawnnak ruangah relcawklo mi tampi kha a hruai khawh hna. Sual thlahpiaknak kha nikhat ah nazi (14) chung a ṭhut hnuah ngakchia hna Pathian bia cawnpiaknak kha a tuah i a upa deuh cang mi hna caah san a tlai mi phungchimnak kha a tuah ton.

Khuachia, khuavang tukforhnak cu 1824 kum in aa thawk i kum 30 hlei a rau. Khuachia (satan) hna sinin ṭihnung mi awthawng hna, kuttongh in ralsernak hna le thilri hna meikangh ternak kha a pehpeh in a sinah a tlung. Ars peng Siangbawipa cu a dang Siangbawi hna i hremnak zong kha a in rih. Annih nih zeihmanh a theilo mi, a titer mipa mihrut tiah Vianney kha a ti. Asinain amah nih “kannih Siangbawi hna chungah hin aa khat mi hruhnak tlawmpal kan ngei cio tiah ka ruah,” tiah a leh. Upatnak caah pek mi zeibantuk hleice in pek mi reng kha a let duh lo. 

1852 kum ah amah cu Monsigor (Bishop bawmtu) a rak si tikah Chalice hrai le a thuam (tinkan) kha a zuar i mi sifak hna kha a pek hna. Amah upatnak Vailamtahtung le pengram kaudeuh nakah ṭuanvo an pek mi zong a duh lo. Vianney cu 1859 kum ah a thi i nihin ni tiang Siangbawi hna caah zohkhenh awktlak mithiang pakhat in a um.