ST. PETER DAMIAN

           Mithiang Peter Damian(Bishop le Bible thiamsang,1007 – 1072) cu Austria khua Bishop a si i Bupi ah Bible thiamsang a simi St. Peter Damian cu 1007 kum, Italy ram, Revina khua ah a rak chuak. A ngakchiat tein a nu le a pa nih an rak thihtak hna caah achuahpi unau hna chungin amah kha sal bantukin tuah i vok hna kha a cawnghter mi a u pa pakhat sinah arak um. A u pa pakhat nih cun a zaangfak ngai i cacawn dingah Sianginn ah a rak chiah. Siangngakchia a si lioah a thluak a rak ṭha ngai i Professor a rak si tik zongah thiamnak he a tlingmi a rak si. Semrel rawlulh in sual ngaichihnak, a chung angki kha Rangmei angki (a shirt of hair) i hruk nak le tangka pek ṭhenhnak hna kha a rak tuah.  Mi sifak hna kha amah pumpak in rawl peknak hna a rak tuah.

            A rauh hlanah St. Damian cu Fonter Avellana i a ummi Benidict Zateih phungki Sianginn ah a lut i Sianginn uktu Zateih a ṭuan. Thlacamnak, Rianhrang ṭuannak le a thianghlimmi thil hna kha chekhlat cawnnak ah a lung aa pe tawn i a Siangngakchia hna kha lungdaihnak, dawtnak le tangdornak hna a rak cawnpiak hna. 1057 kum ah bawmhnak le ruahnak cheuh a rak orh mi Pope Steven IX nawlngeihnak in Austria le Valletri khua Bishop le Cardinal pakhat a rak si. Kum tlawmpal a rauh hnuah Pope Alexandra sinah zaangfah a rak nawl caah Pope nih Zateih sinak ah kirṭhan dingin nawl a rak pek. St. Peter Damian nih Bupi remhṭhan nakah Biaknak eihmuar nak kha a rak doh.

 Nikhat cu Flowrence khua Bishop pa, Chess aa celh lengmang nak kha sual a phawt i sual dantatnak caah Salm hla voithum sak ding le misifak pa 12 kha an keṭawl dingin a rak fial. St. Damian nih Zateih pawl ram dang kalnak zong kha a doh i Zateih nunzia ah lungdai tein umnak lawng a biapi mi a si, tiah a rak ti hna. Sual ngaichih mi hna cungtu ahcun aa tlak ningin a um thiammi a si. A ca ṭialmi ah cuticun a rak ṭial, “Ka dawtmi ka nau le hna, nan lungder hlah seh, nan ton liomi hna cu “Sal” pakhat i sifah thabat nak si loin, Nu le pa cawnpiaknak a ingmi ngakchia hna an ton mi bantuk nan tonmi tu a si. Pathian nih minung kha atu chan ah dan a kan pekmi cu, hmaileichan zungzal dantatnak in khamhnak caah a si. Kum 1072 AD ah Faeza khua ah a rak thi i 1828 kum ah Bupi ah Bible thiamsang (doctor) sinak an rak thanh.