St.John Capistrano

October, 23

Capestrano khua mi Mithiang John, Siangbawi (1386-1456)

          Franciscan bu in minthang phungchimtu St. John cu Italy ram Capestrano khua, 1386 kum ah a chuak. Upadi fimnaklei ah Paraku degree a lak hnuah Perugia peng uktu bawi ah riankhinh arak si. Cu peng ah a rum ngaimi muidawh nu pakhat he an i `hit um.

          Kum 1416 ah a rak thomi Perugia le Maltesles Pine karlak ral doh lioah an tlaih i thong an rak thlak. Cu hnuah a nupi he phungning in an i `hen i Francis bu i chungtel pakhat ah a rak cang. A luancia mi a nunnak kha i remh`han khawhnak caah Perugia peng chungah a sualnak vialte kha hngawng oih in rang fate pakhat aa cit i a vak. Salbantuk tuahsernak in Friar Miner paang Siangbawi cannak Sianginn ah luh ding in a sawk ve. Culioah amah cu kum 30 asi cang nain voikhatnak Bawipa thisa hmanh a rak hmu rih lo.

          Cu Sianginn uktu nih John i kawhauhnak a dinfel le thianghlimnak kha cekhlatnak caah a harbikmi hneksaknak kha a rak tuah. Cuthil hna kha zumhnak le toidornak in a rak ing. Kum 1420 ah Siangbawi cannak a rak hmuh. Cu hnuah Pathian phungchim hram a rak thawk i Italy, Germany, Hungary ram chungkip ah teinak nganpi a rak hmuh.

          Kum 1456 ah Pope nih a hleice `uanvo peknak in Turks miphun hna he ral aa do liomi Crusade ralkap hna sinah a kal i phung a va chimh hna. Turk miphun hna cu Belgrate khua kha an kulh dih i Europe ram vialte kha an tuk laite a si. John cu minung 70000 lawng a simi Crusade ralkap hna kha an sunghnak in teinak ah a rak hruai hna. Thlathum a rauh hnuah vanchiatin chawnhmi zawtnak `halo nih a tlunh ve i a rak thi.