Thazaang lak ding Mithiang Maria Tuanbia Tawi

Izipt ram ah Pathianbia chimtu Mithiang nu Maria i a nun can ziaza cu sual nak chungin aa ngeihchih than mi hna caah zohchunh awk tlak ngai mi nunzia dawh a si. Amah cu a ngakchiat lio tein thatlonak lam a zulmi a rak si i a ziaza thatlonak nih khuachung mi vialte kha thatlo nak lam hmuh sak tu a si tiin Alexzandar khua chung misual cazin ah an chiahmi a rak si. Nikhat cu vailamtah Teinak puai nganpi tuahnak nithla a vun phan; cutikah Palestine ram leiah Pathian biak dingin a kalmi mibu sangphawlawng cit in a ra mi hna kha a hmuh hna; an sin kal ve ding in a lung chung in a hung chuak. Cu ti kal ve a duhnak cu Pathian biak kha siloin hmuh duh le theih duh men ah va kal ve khi a si ko. Cun Maria cu aa thawh ve. Jerusalem khua hlipi kam ahcun Tilawng cu aa din. Cu ahcun lawng i a cuan mi vialte cu an tum dih hna i khulrang in puai tuahnak lei ah cun an kal cio. Vailamtah teinak Biakinn pi chungah cun an lut hna. Minu Maria zong cu mipi hnu zulh in biakinn chung luh ve dingah a kal ve, innka hram a phak ahkhin hmuh khawh lomi kut nih Maria cu a tlaih thup ko. Heh tiah Biakinn chung luh cu aa zuam len. Sihmanhsehlaw hmuh lomi kut nih cun a kham caah a lut kho lo. Cu tikah Maria nih cun hi bantuk tihnung mi thil le khuaruahharnak cu zeidah a si hnga tiah a ruat len. Chikhat te ah a lung a hung fim i ka sualnak le ka thatlonak ruangah hi thil ka tawn hi a si tiah a theih. Cutikah Maria cu a pawngkam le cunglei cu a vun zoh. Amah kha deng deuh in a rak zoh mi a thianghlim mi Mary Pathian nu zuk kha a hmuh. Cu ahcun a nunnak cu ning zahnak in a khat dih i a sualnak vialte caah ngaihchihnak mitthli he a tap. Mary zuk hmai ahcun a khuk aa bil i ka Nu na zaangfahnak cu ka hmuhsak than ko. Ka nunnak hi kaa remh cang lai, sualnak zong ka tuah ti lai lo tiah biakamnak tuah in thla a cam. Cu hnu ah Biakinn pi chungah cun a lut kho. Biakinn chungin an hun chuah pah ah Mary zuk hmai ah cun lawmhnak bia a chim than. Ka Nu na zaangfahnak cu na ka hmuhsak cang. Zeidah tuah seh ti na ka duh tiah khuk bil in a hal. Cu tikah Nu Mary zuk chungin aw pakhat a hung chuak mi cu, Jordan tiva ral ah khan va kal law cuka ahcun na tuah ding cu chimh na si lai tiah a ti. Cu bia cu a theih tikah ka sualnak caah sual ngaihchihnak le sual dantatnak in awk a si ti kha a hngalh. Cu ni ahcun Thetse ramcar ah a va kal i sualngeihnak caah siseh sual dantatnak caah siseh, a ra laimi caan ah mitampi nih sual ngaihchihnak an ngeih i Pathian an theih khawh nakhnga ding caah Pathian nih a timh piakmi caan ning tein, cu ka hmun ahcun amah lawngin a va um. Maria cu a ra laimi hna caah zohchunh aw tlak si ding in a nunnak kha thlacamnak le Pathian bia chimphuannak in caan a rak hmang i a thihnak zong hi thihnak tha a rak thi mi a si. A TIAL TU-------------- Saya Albert Cung Nawl