Padua khua in Mithiang Anthony

June, 13
ST. ANTHONY OF PADUA (SIANGBAWI, DOCTOR)
(1195-1231)
Mi sifak hna kha a bawmtu mithiang a si. Padua khua i mithiang Anthony cu kum 1195 ah Portugal ram Lesboone khua ah a chuak. Kum (15) a ti ah St. Augustine Zateih bu ah a lut i a caan a zat tikah Siangbawi cannak a lak. Kum 1221 kum ahcun St. Francis Zateih bu in martyr pa 5 hna i an ruakpum hna kha Moroco in Portugal pawl nih an phawrh tikah anmah keneh zulh duhnak lungthin kha a rak chuak. Caan tlawmpal a rauh tikah Africa ram i a ummi Muslim hna kha va chimh awkah an thlah. Asinain a rauh hlanah anih cu fakpi in a rak zaw cang. Thla tlawmpal a rauh tikah Portugal a kir`han. Amah he a zulmi tilawngpi cu tilawng lam in ennak a ton caah Sisili ah tilawng cu aa din. Mah in Anthony cu Asisi khua ah a kal i mah khua ahcun mithiang Francis he a ni tong.
Forli pawng i a ummi, minih an phak thenglonak Zateih Sianginn zung ah rian an pek i umkheng `awl rian kha a `uan. A hnu tlawmpal a rauhhnu ah St. Francis bu le St. Dominican bu in Deacon hna kha ordined peknak Forli ah an tuah. I theihthiamnak tlawmpal aa kalh caah Dominican Zateihbu in pakhat hmanh nih phungchim awk caah an rak i ralring lo. Cu a si caah anmah hna aiawh in mithiang Anthony nih phung a chim. A phungchim a `hattuk caah amah i a uktu hna cu tampi an khuaruah a har i mah ni hnu ahcun Italy le France ram ah evangelist in an thlah. Khoika a kal paoh ah mipi hna cu amah bia ngaih awkah an rak i pum. Amah i a nunemnak, Biathiang kha a dong tiang a theih khawhnak ruangah zumlotu tampi hna cu an zia an i thleng hna. Mithiang Anthony cu amah i a hawi asi mi Zateih hna kha biathiang lei fimnak cawnpiak awkah St. Francis nih khunh a pek mi a hmasabik St. Francis Zateih a si. “Hi bantuk hla le cawnnak cu thlacam a duhmi, biak a duh mi, duhnak kha a hrawk kho lo” tiah a rak ti.
Mithiang Anthony cu a nunnak a hnubik caan kha Padua khua ah a dih ter. Kum (36) a ti ah cu khua ahcun a thi. A hnu kum ah khan amah kha mithiang an pek i cu ni thawkin rel cawkloin khuaruahharnak a langhtertu a si tiah a min a thang. Amah cu a thiang mi bawhte Jesuh kha a kut ah aa pom mi kha mi nih an hmuh caah a si. Amah i a thiang mi Bible ca kha a hleideuh in theihhngalhnak lungphun can ah amah kha cauk pakhat he siseh, amah i a thiannak lungphum can ah, Lily pangpar kung he siseh an tahchunhmi a si. Mithiang Anthony nih a kut in a thlirmi Bawipa thisa hmai ah a khuk aa bilmi laa pakhat nih amah he a cancan ah a zulh ve tawn. Hithil ruangah laa a ngeitu pa cu zumhnak a rak ngei ve. Mithiang Anthony cu sifakmi hna nih an bochan mi mithiang a si. Amah i thlacam piaknak kha hmuh awk caah a bikin i ruahchan in pekmi a hlu phaisa, thilri hna kha “Mithiang Anthony min chalh in thla an cam cio. Zeicah kan ti ahcun, voikhat cu Brother a cang hngamipa pakhat cu Pathian biaknak cauk pakhat kha a lak i a tlikpi tikah mithiang Anthony minchalh in cauk hmuh`han dingah thla an cam. Cu mifirpa cu a firmi cauk kha chiah`han dingah thlarau thazaang in namchih nak a in.