Pathein Diocese Chungkhar leikap tuanvo ngeitu hna Hakha an phan..

Pathein Diocese in Chungkhar lei he pehtlai in rian tuan phu hna cu Hakha Diocese ah March 13, 2020 ni ah an phan. Cu ni thiam thiam ah cun Hakha Diocese lei in Chungkhar konglam he pehtlai in tuanvo ngei tu Fr. Thomas Khua Uk Lian Mawi hruai nak in Hakha khua chung um Catholic Khrihfa chungkhar cheukhat hna he Hakha Bishop zungah ton biaruahnak an ngei hna.
Bishop Lucius Hre Kung nih tu lio kan laitlang um chungkhar hna ton cuahmah mi he pehtlai in a chim: "Chungkhar tampi hna cu an rak um nak khua te kha kal tak in Hakha khuapi ah an rak i thial hna. Chungkhar tampi nih an duh mi cu an fale thiamsang an kai nak ah hin tha tein kai kho hna seh ti hi a si " tiah a chim.

Fr. Thomas Khua Uk Lian Mawi nih: "Hi ti in kan Diocese ah nan rak kan tlawng i kan i lawm tuk. Hmai lei zongah hi bantukin ton thannak caan tha khuakhang than hna u sih" tiin don bia a chim ve.

Pathein Diocese lei in upa pakhat nih: " Hlan kan rak ruah ningah cun Lai tlang kai lai ding hi kan zenh pah cio. Sihmanhsehlaw, kan hun kai taktak tikah kan ruah ning bang si loin kan hmuh kan theih mi konglam hna nih thazang tampi an kan ngeihter" tiah a ti.

Bishop Lucius nih " a tu bantukin kan sin nan rak rat cu Pathian Thawngtha nan rak kan phorh a si. Kan ca zongah thla kan cam piak peng uh" tiah a ti hna i thlacam tinak an tuah. Cun Bishop Lucius Hre Kung thluachuah pek nak in an program an dih ter hna.

Cun, Chungkhar lei tuanvo ngeitu hna cu Hakha khuachung, khua pawngah an an leng ti hna.