Pope Francis Poland mino hna sin tha pek nak

Pope Francis nih Poland ram um mino hna sinah Pope John Paul II cawnpiak ning cang theihthiam nak hnga ding caah le cu cawnpiak nak chungin an nunnak ah harnak do-khan tu tei khawhnak thazang i lak cio ding in a sawm hna.

“Nihin ni ah internet thawng langhter nak thawngin a nunning cang hna le a cawnpiak nak hna kha nan theih khawh cio ko cang lai” tiin a bia hramthawhnak ah Pope Francis nih a chim.

Mithiang Pope John Paul II a cawnpiak nak chungin a langhter duh bik mi cu dawtnak le chungkhar i zohkhenhnak kong an si nak zong a chim rih.

Pope pa nih a ti rih mi cu pakhat cio in siseh, chungkhar cio in siseh, harnak kan ton cio mi hna hi “thianhlimnak le lunglawmhnak lam phanh khawhnak ding caah” don-khaan tu tak cu an si lo.

“A cawnpiak nak hna cu chanthar chungkhar hna ton mi harnak hna tei khawhnak ding caah zohchunh awk tlak taktak an si” tiah a ti rih.

Karol Wojtyla tiah a rak no lio i rak hngalh mi mithiang Pope John Paul II cu a rak ngakchiat lio tein a chungkhar hna nih an rak thih tak mi ngaktah pakhat a rak si.

Siangngakchia a rak si lio zongah a dawtmi a hawi le tampi nih Nazi ral ruangah nun-tian in siseh, thih-tian in siseh an rak kal-an rak loh tak mi a rak si fawn.

Wojtyla cu October 1942 ah Archdiocese of Krakow clandestine underground seminary ah siangbawi si ding in a rak lut i a voi-2 nak vawlei pumpi ral lio Nov. 1, 1946 ah Siangbawi ordination a rak hmu mi a si.

August 1944 kum, German ralkap hna nih Krakow khuapi chung buaibainak rengh an timh lio ah inn tangah a hawi cheukhat he an rak i thup hna i cu ka hmun in Bishop umnak inn lei ah an rak zam.

Cu ni nikhat lawngah cun mino tlangval 8000 renglo tlaih-khih an rak tong.

Ral pi a hun dih tik zongah Siangbawi cannak in siseh, Bishop cannak in siseh, communist ral le pathiang a um lo timi cawnpiaknak ral zong tampi a rak tong.

“Harsatnak kan ton mi vialte hna nih zumhnak lei ah pacing sinak le thawnnak a kan pek. Thihnak in a tho tthan mi kan Bawipa Jesuh Khrih kan zumh ruangah  zumhnak lei in hneksak nak kan ton tik zongah kan mah thazang siloin Bawipa thawnnak lawngin tei khawh kan si” tiah Pope Francis nih a ti.

“Dawtmi mino hna, nan nunnak dih lak in Jesuh Khrih sinah i ap ding hi pakhat cio nan cungah kaa ruahchan mi cu a si” ti zong in thazang pek forhfial nak a chim rih.

Mithiang John Paul II cu Krakow archdiocese ah 1964 in Pope thim a si Oct. 16, 1978 tiang cuka Diocese chungah cun Pathian riang thiang a rak ttuan. Pope a si hnu April 2, 2005 kum ah a thi.

A thih hnu thlakhat a si ah mithianghlim sinak hlethlai nak tuah colh a rak si.

Pope Benedict XVI nih Pope John Paul II cu upat pek tlak tuahnak in siseh, May 1, 2011 kum ah bochan bawmhhal ding dirhmun in siseh vawlei cung khua za kip ah thawng theihter nak a rak tuah. April 27, 2014 kum ah Mithiang pakhat sinak vawlei cung khua za kip ah thawngthanh a rak si.