Pathian nih Minung a ton

Pathian nih Minung a ton

PATHIAN AA PHUANNAK

Chuahpi mi lungthin in minung nih Pathian kha a thil tuah mi zoh in a hngalh khawh. Sihmanhsehlaw minung fimthiamnak nih a banh lomi bia phundang a um rih. Cucu Pathian bia phuan a si. Pathian nih lungtho tein a mah lila kha aa phuang i minung sinah a mah pum hrimhrim kha a pek. Cucu Fapa Jesu Khrih le Thiangthlarau a run kan thlah piak kha a si.

PATHIAN NIH A DAWTNAK A PHUAN

“A tthatnak le a fimnak in Pathian nih a mah tein i phuang in a duhnak biathuk kha hngalhter a duh. A duhnakcu minung hih “ Khrih thawngin, Thiangthlarau chungin Pathian sin phan kho hna sehlaw Pathian sinak kha i hrawm kho ve hna seh,” ti hi a si.(Eph 1:9, 2:18, 2pet 1:4)

Pathian nih a mah nunnak kha a sermi minung hna sinah pek in Fapa ngeihchun ah a fa le si dih hna seh ti kha a duh.(1Tim 6:16, Eph 1:4-5). Pathian nih a mha tein aa phuanmi cu minung nih an ti khawnak leng in ka let hna seh, ka hngal kho hna sehlaw ka daw kho hna seh ti a duh caah a si.

A DOTDOT IN PATHIAN AA PHUANNAK

Pathian nih a BIA in zeizong vialte kha a ser i, a zohkhenh, i sermi thil vialte chung in minung nih AMAH hngalh khawhnak kha a pek zungzal. Cu lawng si loin vancung khamhnak lam kha hun a duh caah a hramthawk hrimhrim ah hmasabik kan nu le kan pa sinah aa phuang.(Jn 1:3, Rom !:19-20). A MAH he naih tein i khomh awkah an nih kha a sawm hna i vel le dinnak in a thuamh hna. Mah aa phuannak hi kan nu le kan pa sualnak nih a chat lo. Sualnak chung an tlak hnu zong ah Pathian an nih kha khamhnak i ruahchan awk ah bia a kamh hna i minung caah a siaherh nak kha a hmuhsak zungzal hna. Zeicahtiah lungsau le thinfual in khamhnak a kawl mi vialte hna kha zungzal nunnak pek a duh hna. (Gen 3:15, Rom 2:6-7).

Noah he Biakamnak

Minung phunkhat sinak kha sualnak nih a vun tthek hnu ah Pathian nih minung kha khamh awkah a rak kawl tthan hna. Buanchukcho hnu ah Pathian nih Noah he biakamnak a rak ser i, miphun vialte nih khamhnak an hmuh lainak kong kha a rak chimh.(Gen 10:5, 9:9, 10:20-31). Miphun tampi ah i tthennak in nunning le biaknak lei i tthennak zong a rung chuak. Cucu sualnak chungah a tla mi minung sinak i ruamkainak kha ri khiah awk caah a si.(Lam 17:26-27, Dt 4:19). Babel innsaang sak lio bantuk aa linglet mi duhnak lawng ah khan an lung aa khat. (Fim 10:5, Gen 11:4-6).

Sihmanhsehlaw miphun le uktu bawi hna i Pathian tampi an biaknak le siasal phunphun an biaknak sualnak hna nih Pathian tinhmi kha a hrawh zungzal. (Rom 1:18-25). Noah he biakamnak cu Gentel mi chan chungah hmual a rak ngei ngaingai i cucu Thawngtthabia phuan hlan tiang kha a rak si. (Gen 9:16, Lk 21:24). Bible Thiang nih Gentel mi hna lakah min thangmi mi tampi kha upatnak a rak pek hna.

PATHIAN NIH ABRAHAM A THIM

          Aa tthek mi minung kha pumkhat si ter awkah Pathian nih Abraham kha a auh i a ram, a miphun le a pa inn khan a chuah ter (Gen 12:1). Abraham ah a ser, cucu “miphun tampi hna i pa” tinak a si. Nangmah chungin vawlei miphun vialte cu thluchuah an si te lai,” (Gen 17:5, 12:3, Gal 3:8). Abraham hrinsor le tefa  hna cu hlanlio pupa hna sin i biakamnak kengkawitu, thimmi miphun, Pathian nih a fa le vialte kha Bupi pakhat sinak chungah a pumh hna lainak ni caah tinhmi tefa cu an si (Rom 11:28,24). Pupa hna, Profet hna le Bible Cahlun chung i minthang mi hna cu mithiang tiah upat zungzal an si.

PATHIAN NIH A MIPHUN ISRAEL KHA A SER

Hlan lio pupa hna hnu khan Pathian nih Israel mi kha Igypt ram sal cannak chungin a luat ter hna na in a mah miphun ah a ser hna. An mah he Sinai tlang cungah biakamnak kha a tuah i Moses sin in a mah kha a nungmi le a hmaan mi Pathian, zohkhenhtu Pa, a ding beaceih bawi, a si kha an hngalhnak hnga caah nawlbia kha a pek hna i kamhmi Khamhtu kha a hngah ter hna. Isreal cu “Bawipa min in auhmi” le “Pathian bia a thei hmasa mi” Pathian tlangbawi phun a si (Dt 28:10, Ex 19:6).

Profet hna sin in Pathian nih a miphun kha khamhnak kong ruahchannak ah le mi vialte caah tinhmi a zungzal a hmun hnga mi biakamnak thar in an lungthin chungah ttial hnga mi miphun ah a ser hna (Is 2:2-4, Jer 31:31-34, Heb 10:16). Profet hna nih Pathian mi phun khamhnak kong kha an chim. Zumhnak lei ah derthawmnak in tthennak, miphun zakip caah a si hnga mi khamhnak kong kha an chim (Ez 36: Is 49:5-6, 53:11). Cun Bawipa i a mi sifak hna le toidor mi hna nih mah ruahchannak cu an co te lai. Sarah, Rebeca, Rachel, Miriam, Deborah, Hanah, Judith le Esther nuthiang hna nih Israel miphun khamnak kong ruahchannak cu an nun ter. Anmah lakah a thiangbik mi cu Mary a si ( Zeph 2:3, Lk 1:38).

KHRIH JESUH ..... KARLAK TANGTU LE BIAPHUAN TLINNAK

Lam tampi le a phunphun in Pathian nih hlanlio kan pupa hna sinah Profet hna khaa in bia a chim: Sihmanhsehlaw a hmanungbik kan mah hna chan ah cun a Fapa in kan sinah bia a chim (Heb 1:1-2). Minung a canmi Pathian Fapa Khrih cu Pa Pathian i a tling vikmi BIA a si. Amah chungah zeizong vialte kha a chim dih canag i amh bia hlei in a dang bia a um ti lai lo.

Cu a si caah Khrihfa kamhnak hi a tling cikcek mi Biakam Thar a si i zei tik hmanh ah a lo kho ti lai lo. Cucaah kan Bawipa Khrih a sunparnak in a langh hlantiang biapuan thar dang a um ti lai lo (1Tim 6:14, Tit 2:13). Bia phuan cu a tling cang nain a tling tein hngahl thiam dih a si rih lo. Khrihfa zumhnak ah duhsah in a sullam tling kha hngalh chinchin awk a tang rih.

A chanchan ah “Pumpak biah phuan” ti mi kha a rak um ttheu i a cheu cu Bupi uktu hna nih Bupi in theihhngalh pi nak a tuah. a si nain an nih cu zumhnak ro (deposit of faith) an si lo. Mah hna nih Khrih i bia phuan tling kha a tthancho tertu le a tlin tertu an si lo. Vawlei cung chankhat ah tling deuh le ttha deuh in nun ter khawh awk ca lawng ah a bawmh.