A tthangcho liomi ram hna ah Ngakchia nuai (2) hrawng kumfatin a thi in hrin an si ti hmuh a si

A tthangcho liomi ram hna ah Ngakchia nuai (2) hrawng kumfatin a thi in hrin an si ti hmuh a si

               Unicef le World Health Organization (WHO) hna i hlathlainak chungin 2019 kum ah ngakchia nuai (2) hrawng a thi in an chuak ti an hmuh. Cu naupawi pawl cu a sifak mi ram hna in an si hna. Corona virus ruang i lockdown chungah cu ngakchia a thi in hrinnak percent (%) a kai. "Zeirel loin ummi vawlei pumpi huap i nau hrinnak" timi cathluan ah a thimi ngakchia hna i (84)% cu a tthangcho liomi ram hna in an si. 

               Cu cazin chung ahcun naupawi lioah a paw chung in a thimi le an hrin lioah a thimi hna zong telh chih an si. Second (16) dan in ngakchia sem kaa cu an thi. Mah an thihnak i cheuthum cheuhnih cu Saharan thetse ram, Africa le Southern Asia, Northern Asia hna ah an si. A tthangcho cang mi Europe, Australia, Northern America le New Zealand hna ahcun (6)% lawng an si. An hrinnak ah a thimi ngakchia (40)% cu khamhnak lei, thlopbulnak lei, ngandamnak lei theihhngalh nak a um lo ruangah a si. Nepal khua i Sii-zung (9) ah August thla chung i an hlathlai nak ah Covid caan karlak i a thimi nau sem an tam deuh. 

               March thla chung i naupawi (100) ah (14)% lawng nau a thi in an chuak ko nain May thla dih hnu, lockdown an chiah caan chung i ngakchia (1000) chungah (21) tiang an thi tiah theih a si.