Bupi Nunnak Chung ah Cathiang

Cathiang hngalh lo cu Khrih hngalh lo a si

Pathian Bia a tthawnnak hmual hi mah bantuk a si caah Bupi a drihtu le a thawnnak, Bupi fa le hna caah a thiang mi le a hmun zungzal mi tiput a si. Cu caah Cathiang kha Khrihfa mi vialte nih ngeih dih, rel dih cio awk a si.

Cu a si caah Bible relnak cu Theology cannak i a nunnak a si a hau. Pathian bia phuannak rian hi phungchimnak, Pathian bia cawnnak le Khrihfa cawnpiaknak vialte le biakinn chung phungchimnak ah nunnak rawl(Bawipa thile sa) in ruah zungzal awk a si i Cathiangbia thawngin thiannak ah i zuam awk a si.

Cu asicaah Bupi nih Khrihfa zumtu vialte hna kha Cathiang rel lengmang nak in a sungbikmi Jesuh Khrih hngalhnak kha cawn awk ah biatak tein a forhfial hna. “Cathiang hngalh lo cu Khrih hngalh lo a si”, (St.Jerome).

A mah te aa phuannak in hmuhkhawh lo mi Pathian nih a dawtnak tling kha minung kha a hawi, tiah a ti hna i an mah lak ah a tlongleng. Amah hawikomhnak ah a sawm hna i a cohlan hna.(Col 1:15, 1Tim 1:17,Ex 33:11, Jn 15:14-15, Bar 3:38). Mah sawmnak i a tlaakmi leh nak cu “Zumhnak” a si.

Zumhnak in minung nih a fimnak le duhnak vialte kha Pathian sin ah a chanh dih. A pum dihlak Pathian sin ah a pek. Mah Pathian sin leh nak kha Cathiang nih “Zumhnak Nawl ngaihnak” tiah a auh ( Rom 1:5, 16:26).

Zumhnak in nawlngai cu theihmi bia cungah lungtho tein i dor kha a si. Zeicahtiah zumhnak biatak cu Pathian nih aamah a khaan(guarantee) a pek. Abraham cu mah bantuk nawlngaihnak caah i zohchunh awk a si. Ngaknu Thiang Mary cu nawlngaihnak ah a tling bikmi a si.

Hebrew Cakuat nih Israel pupa hna zumhnak kha a thangthat i Abraham zumhnak kha a thangtthat khun. Zumhnak in ro ah a hmuh hngami hmunhma le khua le ram ah, Abraham cu chuah awk ah auh a vun si tikah a ngaih i khoika ah dah ka kal lai ti kha a hngalh lo bu in a chuak (Heb 11:8, Gen 12:1-4).  Zumhnak in biakamhmi ram ah mi khual le Pathian biak awkah a kal mi hna bang in a kal (Gen 23:4). Zumhnak in Sarah nih biakamh mi fapa kha a pawi i hrin. Zumhnak in Abraham nih a fapa ngeihchun kha raithawi awk ah a pek (Heb 11:17).

Abraham nih cuticun (Heb 11:1) i zumhnak kong a chimmi kha a tlinter. Zumhnak cu kan i ruahchanmi thil hna kha kan hmuh lai, hmuhkhawhlo mi thil hna kha an um taktak ko tiah lungthiang tein in um kha a si. Abraham nih Pathian kha a zumh i cucu a dinnak ah a rel piak. Abraham cu a zumhnak a feh caah “ a zummi vialte hna caah pa” ah a cang. (Rom 4:18).

Biakam Hlun cu mah zumhna kong tehte khaan nak ah a rum ngaingai. Hebrew Cakuat nih Pathian hnatlak nak a hmu mi pupa hna an zumhnak kha thangtthat in a ttial. (Heb 11:2-39). Sihmanhsehlaw Pathian nih kan caah a ttha deuhmi thil kha a hmuh chung cang. A Fapa Jesuh zumhnak vel kha a si. (Heb 11:40, 12;2).

Ngaknu Thiang Mary hi zumhnak in nawlngaihnak kha a tlingbik in a ngeimi a si. Zumhnak in Mary nih vancungmi Gabriel thangthanhnak le biakamnak kha a cohlan i Pathian caah a si kho lo mi zei hmanh a um lo ti kha a zumh. Cucaah, “Zohhmanh, Keimah cu Bawipa salnu ka si, na bia bangin ka cungah tling ko seh,” tiah a ti (Lk 1:37-38). Elizabeth nih a biakchawnh “ Bawipa nih a chimmi bia kha a tling lai tiah a zum mi nu cu thluachuakmi a si (Lk 1:45). Mah zumhnak ruangah hin Mary cu mi vialte nih “Thluachuak Nu”, tiah an auh.(Lk 1:48).

A nunchung vialte le a Fapa vailam cung ah a thih tiang hmanh Mary a zumhnak cu aa hnin bal lo. (Lk 2:35). Pathian bia a tling lai ti kha a zumhnak pum a langhnak tiah Mary kha a upat.