Zumhnak ah hmunhnak

Zumhnak ah Hmunhnak: Zumhnak cu minung caah Pathian nih a sermi man loin pekmi laksaawng a si. Mah a man chim khawh a si lo mi zumhnak hi Mithiang Paul nih Timothy sin ah a chim bang in kan thlau khawh. Zumhnak le lungthin thiang kha fek tein i tlaih law ral kha ttha tein do ko. Mi a cheu nih an chiattha thleidannak lungthin kha an hlawt i an zumhnak kha an rawhter tawn. 1Tim 1:18-19. Zumhnak ah a dongh tiang nun awk tthan le i hmunh awk ah le zumhnak kha karhter awk ah Bawipa kha kan nawl a hau i Bupi zumhnak chungah hram a  bunh awk a si (Gal 5:6).

Zumhnak hi vawleicung kan khual tlawnnak i tinh nak a si mi Pathian hmai hmuhnak kha a kan tehter chung. Cu tikah Pathian kha a sining te in hmaitonh tein kan hmuh lai (1Cor 13:12). Cuticun zumhnak cu zungzasl nunnak a hramthawhnak a si.

Sihmanhsehlaw a tu cu “Zumhnak in kan nung, kan hmu rih lo” (2Cor5:7). Pathian kha thlalang bih bantuk in mawchialchual le a cheuchum lawng in kan theih.(1Cor 13:12). Cu caah zumhnak a ngeimi hna hi muihnak chung ah an nung ttheu tawn hneksaknak kha an in theu tawn. Kan umnak vawlei hi zumhnak nih bia a kan kamhmi ram he aa hlat ngaingaimi a lo tawn. Tthat lo nak le sifah temhnak, dinfel lo nak le thihnak hna hi Thawngtthabia he aa ralchan mi an lo tawn. Mah hna nih hin kan zumhnak kha a hninhter i tukforhnak ah an cang. Cutikah zumhnak tehte khaannak ah kan i mer a hau.

Abraham cu ruahchan awk a um lo mi kha a zumh (Rom 4:18). Ngaknu thiang Bawinu Mary z ong zumhnak zan khuamui chungah a kal i a Fapa temhinnak le thihnak kha a in pi ve (Mt 18). A dang zumhnak tampi kong kha kan hmuh khawh rih ko. Hi tluk in a nganmi tehte bu nih khan an kan kulh caah lam a kan dawntu thil paohpaoh le kan tlaihchan peng ko mi sualnak vialte kha hlaw hna u sihlaw kan hmailei ah chiahmi kawltung lei tlik zuamnak ah khan tli ko u sih (Heb 12:1-2).

Zumhnak cu pumpak bia a si. Pathian nih hram a thawhmi kha pumpak lungthawhnak in leh mi a phi a si. Sihmanhsehlaw, zumhnak cu mah tein tuahmi thil a si lo.   A ho  hmanh a mah lawng tein a zum lo. A ho hmanh a mah te lawngin khua a sak khawh lo bantuk kha a si. Nunnak kha nangmah lawng tein na hmuh lo bantuk in zumhnak zong nangmah tein naa pe lo.

Zumtu hna cu an zumhnak kha mi dang sin in an hmuh. Jesuh le kan innpa dawtnak nih kan zumhnak kha midang sin ah chimh awk ah a kan forh. Cuticun a zummi pakhat cio hi a zummi mi tampi  he khih kan si. Mi dang an zumhnak nih khan ka kal pi ve hlah sehlaw ka zum kho lai lo. Ka zumhnak nih midang kha an zumhnak ah a bawmh ve hna. “ Zeizong tuah kho” ( Lamkaltu hna zumhnak bia) a zummi Khrihfa mi nih an phuan cio mi Bupi zumhnak a si.