Tours khua i Mithiang Martin

November, 11

TOURS KHUAMI ST. MARTIN B-mem (Bishop)

          Ralkap hna zohkhenhtu mithiang St. Martin cu kum 316, Hungary ram Pannomia khua ah RC a si lomi budang nu le pa nih an hrin. Rome cozah bawi pakhat i fapa a si bantukin ralkap chungah hramhram in an luhter. Kum 23 a si, Amiens i sakhaan ah an um lioah a khua a siktuk caah a thi dengmang cangmi halvaak pakhat kha kutka pawngah a hmuh. Chikhat lioah a ralkap angki kha cheuhnih ah a cheu i cheukhat kha a pekcolh. Cuzan a it tikah Martin cu a mang ah Jesuh Bawipa nih cu angki aa hrukkha a hmuh.

Cu thawkin ralkaprian kaltak in Pathian riantu kha `uan dingah a lungah a chiah peng. Asinain Barbarian mi`halo ral pawl nih an raktuk laite caan a si lengah Siangpahrang Julian zong nih hi a ruahnak cu ralchiami hna tuah sernak tiah a sullam a hmuhpiak caah Martin nih “Jesuh Khrih min in hriamnam i tlailoin ral chungah dirding le ral hna sin ah keimah pakhatte lawng in tuk dingin timhcia ka si ko,” tiah a rak leh. Cuhnu nikhat ah ral hna nih daihnak lak dingin khuaruahhar awkin an rak chimh hna. Cutikah Martin cu ralkap rian in chuak le tipil innak nawl a rak hmuh.

 A chungkhar hna kha thawng`ha a chimh hna hnuah Liguge ah Zateik aa hruk. Kum 371 ah Tour khua Bishop cannak an pek. Martin nih Tuukhal `ha a sinak kha a langhter khawh. Zateik Sianginn a sak hleiah Siangbawi hna zongkha ca a chimh hna i khuate fa hna i thlennak kha fakpiin aa zuam. Amah cu Biaknak dang hna i biak`heng le a thiangmi thingkung hna kha a hrawhpiak hna tiah zumh a rak si.

A nunnak a hnubik caanah a kut pahnih kha vanah a thlir peng. Na sir in na ih ahcun na siarem deuh lai a timi hna kha, “Vawlei zoh nak in Vancung tukha ka zoh ter u,” tiah a ti hna. Cu hnuah a pawng i khuachia a dirkha a hmuhtikah, “Nang, thidawp a duhmipa, keicu na rawl ka si lo, Nangmah na ei awk rawl ka si kho lo,” tiah chim buin kum 397 ah a thi.