Pathian nih a sermi an si maw?

Pathian Nih Tthatlonak A Ser Maw?

Zeizong vialte a tuahkhotu Pathian nih vawlei kha daawhte le remtein a sermi vialte kha a zohkhenh hna ah cun zeicahdah vawlei cungah tthat lonak hi a um hnga? Mah bia halnak hi hrial khawh lomi le a har ngaimi khuaruah har awk thil a si caah ttuk ttak men in a phi pek ah cun a za lai lo. Khrihfa zumhnak a zapi tein zohnak lawng nih hi bia halnak kha a phi a pek khawh.

Sernak a tthatnak, sualnak le Pathian lungsaunak, le a dawtnak, a Fapa nih minung khamh awkah minung cannak a laknak, Thlarau laksawng a kan peknak, a Bupi, Sacrament tthawnnak le thluachuah nunnak vialte hi an i tel dih. Khrihfa zumhnak bia vialte hi tthatlonak kong a phi he pehtlaihnak a ngei lomi pakhat hmanh a um lo.

Zeicahhen Pathian nih vawlei hi tthatlonak zeihmanh umlo in a tling in a ser hnga lo? Relcawklo a tthawnnak in Pathian nih mahnak in a ttha deuhmi kha a ser khawh ko. Sihmanhsehlaw relcawklo a fimnak le a tthatnak in Pathian nih hi vawlei hi khual a tlawng lio mi sinak in a tlinnak lei ah a kalmi si hna seh ti kha a duh. Pathian khuakhaannak chungah mah bantuk cun a sinak hnga a cheu thil kha i lang hna seh law a cheu thil kha tlau hna seh, a satu le a hrawktu um hna seh, ti kha Pathian tinhnak chungah a um. Pumsa tthatnak le tthatlonak cu sermi hna nih tlinnak ah an phanh hlan lo a um peng ko lai.

Vanmi hna le minung hna hi fimnak le luatnak a ngeimi an si caah anmah duhnak in an kawltung cu an i thim. Cucaah an pial kho, an sual kho. Cuticun ziaza tthatlonak hi vawlei ah a lut. Pathian hi direct in siseh, indirect in siseh a tthalomi ziaza hram cu a si lo. Sihmanhsehlaw tthatlonak kha a awnh i cucu sermi hna an luatnak kha a upat i, khuaruahhar awk in zeitindah mah hna chung hin tthatnak a rak chuah lai ti kha a hngalh caah a si.

Vawlei cungah Pathian zohkhenhnak nih a ttha lo mi chungin a ttha mi a chuahter khawh ti zong kan hmuh. Joseph nih a unau hna sinah hi ti hin a ti hna. “ Hi ka ah a rak ka thlahmi hi nan mah nan si lo, Pathian a si... nan mah nih ka cungah khan tthatlonak kha nan duh, sihmanhsehlaw Pathian nih tthatnak caah a rak tuah. Cucu mi tampi an nunnak hnga caah a si(Gen 45:8, 50:20).

Vawlei cungah a tthalobik mi sualnak nih a chuahpi mi, “Pathian Fapa ngeihchun an hlawtnak le an thahnak nih Pathian velngeihnak a tam chinchinmi a tthabik thil kha a chuahter”. Cucu Khrih thangtthatnak a sinak le kan mha khamh kan sinak hi a si. Sihmanhsehlaw mah vialte ruangah tthatlonak cu tthatnak ah an cang bal lo. “zeizong vialte ah Pathian nih amah a dawmi hna caah cun a ttha mi kha a tuah ko ti kha ka hngalh” (Rom 8:28).

Pathian hi vawlei le vawlei tuanbia Bawipa asi ti kha fektein kan zumh. Sihmanhsehlaw a kan zohkhenh nak lam hi kan hngal ttheu tawn lo. Can dongh tik lawngah a tlinglomi kan hngallhnak hi a dih lai i Pathian kha hmaitonh tein kan hmuh tikah Pathian nih a kan hruaining kha tling tein kan hngalh te lai.(1Cor 13:12).