Hakha Diocese Mino hna cawlcanghnak

Hakha Diocese chungum, Hakha Diocese Catholic mino hna nih December 2, 2020 ni ah Covid-19 zawt khamhnak lei he pehtlai in a herh mi thilri, Hakha khua chungum Siizungpi ah an hlut tiah thawng theih a si.

Hi konglam he pehtlai in Hakha Diocese mino president Moses Aung Moe Kyaw nih hi tiin a chim: “Hakha Diocese mino aiawh in Hakha khua chungum Catholic mino hna nih Covid-19 zawtnak hrik thalo a karh lo nak hnga ding caah tiin Hakha Siizungpi ah kan kal i Sizung uk Dr. Zin Ko Ko Aung sinah bawmhnak thil kan va pek” tiah a ti.

 “Hi thil kan hlut mi hi Myanmar rampi huap Catholic mino hna nih Covid-19 response caah tiin hmuitinh mi a si caah kan nih Hakha Diocese chungum Catholic mino hna zong nih hi tin kan tuah ve nak hi a si” tiah a chim chap.

Rev. Fr. Peter Thang Ki Mang zong nih “Hi bantukin Siizungpi ah kan rat nak bik a sullam cu Hakha Diocese chungum mino hna cawlcanghnak in Covid-19 zawtnak a karh lo nak hnga ding caah ti mi hmuitinh in kan rat mi a si” tiah a chim ve.

Hakha Siizung uk a si mi Dr. Zin Ko Ko Aung nih lawmhnak bia a chim ve: “Tu bantukin thil nan rak kan hlut caah nan cungah lunglawmhnak tampi ka ngei. Zeicah tiah cun, Covid-19 zawtnak aa thawh ka lio ah khan cun sizung caah tiin mi tampi nih thilri in siseh, chawva in siseh an kan hlut cio. Sihmanhsehlaw, a caan a hun sau tik ah a hlutu zong an hung tlawm ngai cang. Nihin ni ah Catholic mino hna nih Covid-19 zawtnak khamhnak ding caah tiin thil nan rak kan hlut caah nan cungah lunglawmhnak tampi ka ngei” tiin lunglawmhnak bia a chim ve.

Catholic mino hna an kal nak ah Fr. Peter Thang Ki Mang nih a telpi ve hna i Siizung uk he zong tha tein i chawnhbiak nak zong an ngei hna.