Pawchungum Nau Thah Zong LAINAWN A Si

Nau hrin khamnak le pawchung ummi nau thah hi Khrihfa ziaza a si lo. Nau hrinkhamh timi cu nuva sinak ah naupawi khawhlonak dingah ninglam a phunphun in, si dinnak, nau inn hrolh hmannak, condom hmannak le naungeih khawhnak nau inn thahri i chahnak tibantuk in a hlankan tein naupawi an i khamh ttheo tawn. Hi bantuk kokek  phungning ralchanh in nau pawi le fahrin i khamh cu sualngan tuah a si. 1981 kum ah chuahmi Familiaris Consortio cathluan ah Pope John Paul II nih naupawi khamhnak cu a thiang lehthah tthitumhnak ah a telmi fanu fapa hrinpiaknak kha a ralchan tiah Pope Pau IV i cawnpiaknak kha a fehter tthan.

Cubantuk naupawi hrawhnak, naupawi khamhnak hna cu Pathian duhnak he a ralchan caah sualngan tuah a si. Lehthah kutsih in aa tthi um cangmi nuva nih fa le hrinpiak nak cu Pathian i sernak rian kha a bawmhmi a si. Gen 1:28 ah "tefa tampi hring hna u law nan tefa hna cu vawleicung khua zakip ah khat hna seh". Onan cu a ihpimi nu kha fapawiter a duh lo ruangah a ci kha ping pang ah a chuahter caah Pathian nih a mah kha a thah (Gen38:8-10). Bupi cawnpiaknak ningin tthitumhnak Sacrament ah pakhat le pakhat i dawtnak, fanu fapa hrinpiaknak ti in tinhnak ning in a hmuh lai ti a si.

Vawlei chava, tangkaa thilri khon duh rih ruah ah, zalong tein nuamhduh rih ruah ah fate hrin duh lo in i kham cu saul ngan tuah a si. A sinain nupi le va pakhatkhat tlamtlin lo ruangah a cunglei i langhtermi fanu fapa hrinnak a tlolh tikah a sual ti duhnak a si lo. Nau tlawm deuh ngeihnak ding le nau i hlaatnak ding ah ti in natural family planing timi nu le va nih mah tein i sum i nau ngeihkhawhnak caan ah nuva sinak hrial khawhnak cu Bupi nih a cohlan ve.