Mithiang Charbel

July 24

Mithiang Charbel Makhlouf, O.L.M (1828- 1898)

            Youssef Anton Makhlouf (Mithiang Charbel Makhlouf) cu May,8, 1828 kumah Antoun Zaarour Makhlouf le Brigitta Chidiac nih an rak hrin. Unau panga a ngeih hna. Lebanon tlang sang pakhat a simi Bekaa Kafra ti mi khuate ah an rak um lioah August 1831 kumah a pa nih a rak thih taak hna. An rak ngak`ah caah nun khua harsa ngai in an rak um. A hngakchiat te in tuu a rak cong tawn i a ti khawhtawk  tein chungkhar caah khatlei in a rak bawm ve hna. A pa a thih hnuah a nu nih va dang a rak ngeih ko nain anpa ei nih a rak chiah ta tthan hna i a thianghlim mi nun phungah a rak luh taak hna. A hnu ah cun cu pa zong cu an khua zohkhenhtu Siangbawi ah a hung cang ve.

            Youssef cu Pathian a tihzahmi chungkhar in a `hangmi a si caah, mithiangmi hna nunzia le thianhlimnak nunphung nunzia kha a rak duh ngaingai a si ve. A no deuh lioah hin an zuatmi satil hna kha a zohkhenhtu a rak si. An khua pawng um lungkua pawngah a satil hna kha a rak cong tawn hna i amah nih Bawinu Mary zuk pakhat a rak chiah i chunnitlak Bawinu Mary sinah thlacaam in a caan a rak liamter tawn.

            1851 kumah a chungkhar hna kal taak in vawlei nun phunglam a kal taak cangmi hna um nak Our Lady of Mayfouq hmun um Moronite timi hna phu chungah a rak lut ve. July 23, 1859 kum ah Bkerke timi khua ah Siangbawi cannak a rak hmu. Cuhnu ah St. Maron Monastery ah aa tthial i cun ka hmunah cun faak piin Pathian sin thlacam in a um. 1875 kum in cunglei zohkhenhtu Siangbawi hna nih St. Peter le Paul thlacam hmun ah um khawh nak nawl an rak pek i cu ni thawkin a thih kum December 24, 1898 tiang kum 23 chung Pathian sin faak pi thlacam buin a rak um.

            Mithiang Charbel cu Christmas lai zanah a thi i Christmas ni ah a ruak cu St. Maron’s Monastery ah an tthial tthan. A ruak an `hial lio caanah a ruak a phurtupa George Emmanuel Abi-Saseen timi nih a chimmi cu, “Father Charbel cu Christmas lai zanah a thi. Cu zan cu horha hna zong a tla ngaingai. Christmas ni ah a ruak cu kan tthial. A ruak kan `hial hlaan chung paoh cu horha hi tamtuk a tlak hleiah khua zong a dawm ngaingai. A ruak kan hun `hial tikah nikhua a hun `ha i nikhua zong a thiang ngaingai”, tiah a ti.

            A thih hnu thla tlawmpal ah an vui nak thlaan cungah a ceu ngaingai mi nih a velh kha an hmuh. Ahawi tlangbawi rianttuan tti upa hna nih a thlaan cun an hlai (on) ter hna i taksa rawhralnak zeihmanh a um lo kha an hmuh. Cu ni thawkin a taak chungin thi bantuk a simi ti kha an chuak. Sihmanhsehlaw a taksa cu a rawk deuh hlei lo. Si lei a thiam ngaingai  mi sibawi hna nih an hlathlai len ko nain an thei ko lo. An khuaruah lawng a har ko. 1950 kum, 1952 kum, 1955 kum le 1965 kum hna ah a ruak cu an hlai lengmang ko nain rawhral nak zeihmanh a um lo. Sihmanhsehlaw 1976 kum ah a thlaan cu an hun hlai `han tikah a taksa zeihmanh um ti loin a ruh lawng a taan kha an hmuh.

         A thih hnu ah khuaruahhar a simi thil phunphun (miracles) an hun lang. Cu khuaruahhar thil hna lakah pakhat, Nohad El Shami timi kum 55 a si cangmi nu nih a ton mi kan hun langhter lai. Mah nu cu a pum cheu zennak ngei mi (paralysis) a si. January 22, 1993 kum zaan ah mang pakhat a manh. A mang ahcun Maronite Siangbawi pahnih a ihkhun pawngah an dir i pakhat nih a chantling a domhpiak i pakhat nih a kut in a hnawng a hmehpiak. A vun i hlau tikah mah nu nih cun a hnawng khatlei kam veve ah hmape pahnih a hmuh hna. Cu thawk cun a zennak zong an dam hna. A ka dam tertu hi mithiang Charbel a si ti cu a theih nain a dang pakhat tu kha cu a ho a si ti a thei lo.

        A thaizan a mang ah mithiang Charbel cu a hun hmuh tthan. A mang ah cun mithiang Charbel nih a ti mi cu, “An thlop tu hi keimah ka si. Na dam nak hi mihna nih hmu hna sehlaw Pathian sin an zumhnak fek chinchin seh ti ka duh nak a si. Na thih hlaan chung Biaknak kong ah mahlawng a ummi hna umnak hmun (hermitage) ah na kal lai i thla ni 22 paoh ah Missa na va kai lai” tiah a rak ti. Cu ni thawk cun St. Charbel in Annaya timi hmun ah duhsah tein thla ni 22 ni caan paoh ah Missa a kaimi in an hungkhat.

            October 9, 1977 kum ah Pope Paul VI nih Charbel cu mithiang a si tiin Bupi aiawh in thawngthanhnak a tuah. Mithiang Charbel cu a nun lio caanah a thianghlim mi nun dawh in a min a thang ngaingai mi a rak si. A mah cu Catholic Bupi nih mithiang sinak langhternak a rak tuahmi a si. Moronite Khrihfa tampi hna nih thluachuah pek mi thilthuam hna hmang in mizaw hna cungah cu thil cu an chiah hna i Pathian sin thla an cam tikah, mithiang Charbel sinah thlacam bomhnak an hal i damnak tampi an hmu hna.