Catechism Teacher’s Training

St. Joseph Cathedral biakinn ah “Catechism Teacher’s Training” cu 31^st May – June 5, 2021 tiang tuah a si tiah theih a si. Hi konglam he pehtlai in ttuanvo la tu Rev. Fr. Peter Thang Ki Mang nih hi tihin a chim.

“Hi cawnpiak nak ah hin abikin ttuanvo a la i a chimtu hi Rev. Fr. Lucas Tha Ling Sum a si. Training hi voi(3) tiang tuah kan i tim.  Avoi(1) nak course hi cu mino pawl nih Sunday school ngakchia Pathian bia an cawnpiak khawh hna nak hnga ding caah timi tinhnak he thawk mi a si i hi training an dih in (practical) ngakchia pawl kha an chimh hmasat hna lai. Cu dih cun renewal course kan tuah tthan lai. Voi(3) tiang tuah ding cu kan i tim. Course (3) tiang a dih kho mi hna kha certificate kan pek hna lai i hi kan pek mi hna nih hin zalong tein Sunday school chimh khawh nawl an ngei cang hna lai” tiah a ti.

An i hmuitinh mi kong he pehtlai in: “St. Joseph Cathedral in thok in diocesan level tiang Sunday school cawnpiak tu hna tam chinchin in kan ngeih khawh hna ding hi a si” tiah Fr. Peter nih a chimchap.

Pathian bia cawnnak ah Hakha khua chung um catholic mino tampi an chuak kho hna cawnpiaktu hna ca lawngah siloin Pathian bia theih duh ah a ra mi zong tampi an um.

“Cawn hram kan thawh ni hrimhrim ah 30 leng an kai khawh hlei ah nikhat hnu nikhat an karh chin leng mang i hihi cu lunghmuih a um ngai. Sunday school a chimtu hnga ding mi hna lawng siloin Pathian bia cawn duh ruang le theih duh ruangah a rak kai mi zong tampi an um. Mino hna nih Pathian bia cawn duhnak lungthin an ngeih rih mi hrimhrim hi a ttha tuk mi a si”.

Training tuah te tthan lai ding kong he pehtlai in:

“Caan cu rikhiah khawh a si rih lo. Kan ton cuahmah mi boruak ruangah siseh, covid-19 ruangah siseh, a cawnpiaktu hnga ding mi hna an caan rem tik caan le, a bik in mino pawl an i manh caan hi zoh in tuah tthan a si te ko lai” tiah a ti.

Cawnhram thawh tthan tik konglam he pehtlai in a chimchap mi cu:

“Training(2) nak kan thok tthan tikah cun cawnpiak dingmi subject pawl hna hi ttha tein tthen i chimh dingah kan i tim, sacrament kong maw, theology lei in maw, moral leikap in maw, tbt, in kan ttha tein kan tthen tthan te lai. ” tiah ttuanvo la tu Fr. Peter nih a ti.

A donghnak ah Cathedral rector Msgr. Fr. Jerome Hlawn Khawl nih: “Training a kai kho mi mino pawl nan dih lak cungah lawmhnak tampi ka ngei. Pathian nih training chung i nan cawn nan theih mi cungah a theipar tampi in chuahter ko seh. Hmai lei zongah pehzulh in Pathian bia cawnnak kan tuah rih hna lai. Kai kawh dingin rak i zuam cio ko u” tiah a ti.