Catholic Bishop Hna I Avoi 16 Nak Tonpumhnak(Synod) Ṭhenkhatnak (Part One)

Biak Tonpumhnak (Synod)

Vawleicung pumhuap in tuahmi Catholic Bishop hna Tonpumhnak avoi 16 nak cu Pope Francis hruainak in Vatican i Pope Paul VI innkhaanpi (Hall) ah 2023 October 4 zanlei suimilam 4:15 ah an thawk. Hi tonpumhnak nih aa tinhmi cu “pumkhat sinak, hmunkhat ah i bawmh in rianṭuanṭinak, Pathian rianṭuannak le thawngṭhabia phuanak rianṭuan tikah hmunkhatte ah khual a tlawngmi Bupi si dingah,” ti hna hi an si.

Bishop hna tonpumhnak kum 50 tlin kum (2015 October 17 i an raktuah lio) ah Pope Francis nih a rak chimmi “hmunkhatte ah khual a tlawngmi Bupi cu Khrihfa hna i an aw kha a ngai piaktu Bupi a si, (a synodal Church is a Church which listens)” ti mi kha hngatchan in, “Catholic Bupi le Catholic Khrihfa a simi vialte nih, Bawi Jesuh sin in an hmuhmi vel laksawng le pahrang ning cio in (Efesa 4:7), hi tonpumhnak ah i telnak nawl, covo an ngei tiah Bishop hna tonpumhnak ah ṭuanvo ngeitu Cardinal Mario Grech nih a chim.

Egypt ram, Alexandria khua in Coptic Catholic (Nichuah ram Catholic) Bishop Ibrahim Isaac Sidrak nih, “Bawi Jesuh Khrih cu, pumkhat sinak, hmunkhat te ah rianṭuanṭinak le i bawmhchannak, Pathian rianṭuannak le thawngṭha chimnak hna i hmuh khawhmi hmelchunnak ah hmunkhat khualtlawn ṭi khawhnak dingah tuanbia ah a caam dingmi hi tonpumhnak a hlawhtlin khawknak dingah a dawtnak in lam a kan hruai ko”, tiah a chim.

Alexandria i Bishop Ibrahim Isaac Sidrak nih a chim rih mi cu, “hi tonpumhnak ah Bawi Jesuh kha a laifangah chiah in ceimai dingmi vialte a hramthawk, a lai in a dongh tiang Bawi Jesuh nih a kan telpi nak hnga le Thiang Thlarau ceunak kha hal buin Bawipa lawng ah hi tonpumhnak cu a hlawh a tling lai” tiah a chim.

Tonpumhnak meeting hall ah timhtuah mi cabuai hna i a sullam he peh tlai in, “hi tonpumhnak (meeting) ah kan zapi te kan i tluk, kan i ruang dih tinak ah cabuai a pummi (စားပွဲဝိုင်း), nih ralrinnak a kan pek. Zei poah ah lam a kan hruaitu cu Thiang Thlarau Pathian a si i a mah i lam hruainak kha kan thinlung innka a dihlak in kan hunpiak lawngah, hi tonpumhnak i kawh auh kan si mi kha man kan ngeihter khawh lai, tiah Luxembourg ram ai awhtu Cardinal Jean Claude Hollerich nih a ti.

A chim rih mi cu Thiang Thlarau Pathian kong chimphuannak cu Bawi Jesuh Khrih cungah kan ruahnak a zor deuh tinak si hin loin hmunkhat i Missa raithawinak kan tuahṭi nak ah Thiang Thlarau Pathian nih Bawi Jesuh kha kan lak ah , kan sinah a umter i, Pa Pathian nih vailam cungah thihnak a tuar i a thoṭhanmi Jesuh Khrih le kanmah vialte kha Thiang Thlarau thawng in pumkhat ah a kan canter, tiah a chim.

Hi tonpumhnak ah Asia ram um Bishop hna i haotu (president) le Kawlram Bishop vialte hna haotu a simi Cardinal Charles Bo, Kentung Diocese i Bishop John Saw Yawhan le Daw Rosalia Cho Cho Tin hna an kai ve. Hi tonpumhnak cu October 4 in 29 tiang an tuah lai.

#Photo:Credit