China ram um Catholic Khrihfa hna sinah Pope Francis nih thazang pek bomhnak bia a chim

 

China ram um Catholic Khrihfa hna sinah Pope Francis nih thazang pek bomhnak bia a chim

 “China ram um dawtmi Catholic fanu fapa le hna, catholic bupi cu nan mah he a um zungzal ko timi hi theihter tthan kan duh hna; bupi a tengnge ah a tel mi nan si bantuk in nan harsatnak ah siseh, nan i ruahchan nak vialte hna cungah catholic bupi zong nih nan mah hna he hmukhat ah an hrawmpi peng ve ko hna. Thiang Thlarau Pathian vel thawngin, Bawipa thawngtha bia a thawtnak le a ceunak nan chungah um ko seh. Bawipa Pathian thawnnak thawngin Bawipa bia a cohlang i a zum mi vialte hna nih khamh an conak hnga bupi zong nan caah thlacam buin an um pi peng ko hna” tiah May 24, Regina Coeli thlacam caan ah Pope Francis nih a chim.

China ram um Catholic Khrihfa hna nih Khrihfa hna bawmtu Bawinu Mary, (China ram zohkheh tu Bawinu Mary) puai May 24 ni ah an tuah.

Bawinu May puai cu China ram um Catholic Khrihfa vialte hna caah rampi huap in tuah mi puai pakhat a si i cu puai cu “the National Shrine of Our Lady of Sheshan in Shanghai” ah an tuah.

Vatican News zong nih a langhter ve mi cu; “Pope Francis nih China ram um Catholic Khrihfa hna zong nih “zumhnak lei ah an tthawn nak hnga caah siseh, pakhat le pakhat i hawikomhnak a feh chinchin khawh nak hnga caah siseh, harton caan zongah lunglawm tein kan Bawipa tehte ttha an si khawh zungzal nak hnga caah siseh, mi vialte hna cung zongah dawtnak le ruahchan nak a kauhter tu an si khawh chinchin nak hnga le ram caah mittha (good citizens) an si khawh zungzal nak hnga caah” tiin thla a cam piak hna” tiah an langhter ve.

Kum 2007 kum lio ah Pope Benedict XVI nih May 24 ni cu China ram um Catholic Khrihfa hna caah “Thlacam ni” “A day of Prayer” tiin nithla a rak khiah piak hna i mah ni caan paoh ah cun rampi huap in thlacam ttinak an tuah.

Cu nithla a phak caan poah ah Pope Francis zong nih an mah hna he lungthin khat te le hmunkhat te si nak ca a ttial i a kuat lengmang hna.

Bupi lubik um nak Holy See le China ram kap-hnih i hawikomhnak cu 2018 kum September thla ah fehter a rak si i cu ni thawk in China ram chung catholic Khrihfa hruaitu Bishop hna zong lang ngai in consecration tuah hram zong an rak thawk.

China ram uk bawi lei kap in Bishop Joseph Guo Jincai le John Baptist Yang Xiaoting hna zong Vatican ah 2018 kum mino tonpumnak hmun ah an rak thlah hna.

Cu bantuk thiamthiam in China ram um Catholic Khrihfa hna zong nih social media lei in siseh Pope Francis nifatin Missa raithawi nak a tuah caan paoh ah tel khawh an i zuam ve hna.

 

https://bit.ly/2ZBpXfR

Add new comment

10 + 3 =