Covid Cithar Zohngiat Hmun

INDIA AH CATHOLIC UNIVERSITY KHA COVID THLOPNAK HMUN AH AN HUN

Indiaram, Kolkata i St. Xavier Catholic university kha,

          Covid zawtnak chawnhnak um maw umlo zohngiat mi hna chiahnak hmun caah onnak nawl an pek.  Khi University cu Jesuit siangbawi pawl nih `tuanvo lakin an hunmi asi. University i bawmtu zungbawi upabik asimi Fr. Felix Raj, S.J nih chambau harsatmi khua hna i innchungkhar hna cu a bituk mi inn ah an um hna i, an i tettuk, cucaah zumh asilo mi mizaw hna kha inn ah chiahmi nakin, atu bantukin timhtuah piak mi hmun ah umternak cu zawtnak an ngeih sicun i chawnhbarhnak in i khamhnak asilai. Mipi nih zawtnak an innak kha mah he aa pehtlai lomi bantukin zoh sawhsawh awk asilo. St. Xavier University mipi hna nunnak harsatnak hna kha kan rak bawmh zungzal tiah hibantuk an onnak kong he pehtlaihin a fianter.

          St. Xavier University cu zumhlo lungaw`tawmnak ngeih i hngah mi mizaw chiahnak inn (3) kha ihkhun (40) he Asansol biaknak i bawmhnak laak in kan timhtuah lai. Hi hmun cu chikhat i dinta in zawtnak cekhlatnak hmun asi. Zawtnak a ngeimi lawng kha sizung ah kuat an si lai. Ngandamnak lei he pehtlaimi chiahpiak ding thilri hna cu ihkhun, oxygen dur, rungrul thahnak si, mizaw zohkhenhtu nurse hna le sibawi hna nih timhcia in an zohkhenh hna lai.

          Culcutta tiah zapi nih theihmi, annih auhnak ah Kolkata ah atu voikhat a chuak`than mi covid chawnhbarhnak cu, India ah minung a chahnak khua pakhat asi bantukin a raang ngaingai. Kolkata a umnak Bengal nitlak lei ah May (13) nikhatte ah zawtnak chawnhbarh mi mizaw (20839) an rak si. India ram pumpi huap in aa chawnhmi an tamtuk caah ihkhun, thawchuahnak thilri oxygen dur hna nih a zawh hna lo. Zawtnak ruangah a thimi hi Delhi le Bengaluru khua pahnih lawng hmanh ah meikhangh ding in i hngah asi.

          India ah zawtnak in a thimi hi buaktlak in nikhat (3500) tluk an si, a thimi dihlak hi an zapi (262000) tluk an si cang. Hi milu cu cazin he fiangtein tuahkhawh rihlo mi zong an um rih.

          Vawleicung ngandamnak le (WHO) chimphuannak nawl ngeitu Tarik Jasarevic nih atu bantukin a thimi an tonnak cu, India ah an hmuhmi Covid zawtnak thar (Covid cithar) ruangah asi tiah a rak ti.

Alehtu _ Nobert Ca Ling