Dinnak le Daihnak nih Ramkel kong le Chaw Lehthalnak kong a Tei a Herh

Justice and Peace Commissions of various national Bishops’ Conferences online meeting tuahnak i aa telmi vialte hna sin ah Covid – 19 rai zawtnak nih a langhter mi chaw lehthalnak le ramkel hruai ning aa pialkalh ning hna kha mipi nih remh cio dingin Pope Francis nih forhfialnak bia a chim.

November 17-18 ni chung tuah mi meeting ah a bik in ceihmainak an tuah mi cu Covid zawtnak a dih tikah harnak tawn khawh te ding mi hna kong kau an si.

Meeting ah aa tel mi vialte hna zong nih mah le ram cio an kir tikah minung lei kong he pehtlai in sining thanchonak lei in thazang chuah cio ding ah Pope Francis nih thazang peknak bia zong a chim.

Cu hnu ah ram kip um Bishops’ Conferences hna zong nih mah le ram sining cio he aa tlak ningin Justice and Peace Commissions phu an dirhmi ah tha tein riantuan cio dingin fehter thannak an tuah.

Pope Francis nih mah le ram sining cio in an dirh mi, Bupi rian zong a si mi zatlaang nunphung le Pathian rian tuannak (social-pastoral work of the Church) hi “Tuah hrimhrim ding mi rian” a si tiah a ti.

Cun meeting chungah aa tel mi hna zong “Laudato si” timi cauk le Fratelli tutti timi cauk le Thawngtha bia thiang hna kha mah le um nak hmun cio ah thanter dingin a chim rih.

“Kan vawlei pi zohkhenhnak le pakhat le pakhat i dawt, i zohkhenhnak lam hnih lawngin chunglei thanchoter ding a simi “Dinnak le Daihnak” hna kha vawlei cung hmunzakip ah ser khawh, dirhkhawh a si lai”.

“Hi lam hnih hna cu Jesuh Khrih thawngtha ah hram aa bunhmi an si caah budang zumhnak dang a pommi hna he felfai tein riantuan ti lawngah langhter, chuahter khawh dingmi rian a si” tiah Pope nih a chim chap.

Pope Francis nih “Justice and Peace Commissions phu chung aa telmi vialte hna zong nih ramkel lei in rian a ttuan mi si hna seh, biaknak lei in rian a tuan mi si hna seh rian tuan ti lawngah Din-Daihnak le Ramkel kong siseh Chaw Lehthalnak kongah siseh,aa pialkalh mi sining hna hi a phichuah khawh a si lai” tiin a bia a donghter.

Tling tein relchap na duh ah cun,
https://bit.ly/3qTVJSS