Pope Francis lunglawmh bia chimnak

St. Peter Basilica ah Pope Francis nih Christmas thingkung le Bawipa Jesuh chuahnak zukinn thluachuah peknak a tuah lio caan ah lunglawmhnak bia a chim mi:

“Dawtmi u le nau hna, St. Peter Basilica Biakinn tual ah Christmas thingkung le Bawipa Jesuh chuahnak zukinn thluachuah pek nak ah aa te kho mi nan dih lak in lunglawm tein kan don hna. A tu bantuk in nan i tel khawh cio nak cung zongah lunglawmhnak tampi ka ngei. Cardinal Rodei Maribor (Minister of Foreign Affairs) le ministers hna, Ambassadors hna le hi ka hmun i a ra kho mi nan dih lak in nan kut kan tleih hna.

Slovenia ram nih a tu bantuk in kan hmuh mi meifar kung senpi hi Kocevje tupi chungin hleice in an thim i a rak kan hlut mi a si. Teramo-Atri Bishop Lorenzo Leuzzi le nawlngei tu phu hna zong nan kut kan tleih hna. Hi thingkung le zukinn langhter nak nih Khamhtu Bawipa minung cannak aa lak nak timi biathuk kha fek chinchin in kan zumh khawh nak hnga ding caah tampi a kan bawmh khawh.

Bawipa minung cannak aa lak nak nih “a tha mi” sifahnak timi le thawngtha he pehtlai in sifahnak a kan cawnpiak. Hi nih hin kan nih vialte hna cu “thluachuakmi” a kan si ter. A thianghlim mi chungkhar(Jesuh, Mary le Joseph) kong kan ruah than tik ah duh a nung mi toidor nun zia nih kan lungthin a kan hnuh khawh ngai. Bethlehem khua ah Mary le Joseph a kal lio caan ah riahnak khualuk pakhat hmah an rak ngei lo (Lk 2:7). Mary nih hi thil vialte hi aa cinken hna i thuk piin a ruah hna (Lk 2:19,51).

Mithiang Joseph nih Mary le hrin lai hnga mi naute caah aa tlak mi riahbuk cu a rak kawl ko. Thawngtha chung kan hmuh bangin tuukhal hna hi a bik in langhter mi an si. An nih hna cu tual chungah an um ko hna. An tuu pawl kha an zohkhenh ko hna. Vancung mi thawngthanhnak cu an mah hna caah a hung si tik ah an i tim i bawhte Jesuh kha an rak kawl (Lk 2:8-16).

Christmas puai pi nih a kan cawnpiak mi cu: Jesuh Khrih cu kan caah “daihnak, lunglawmhnak, kan thawnnak le kan hnemhnak a si” timi hi a si. Sihmahsehlaw, hi vel-thluachuahnak cokhawh dingah ah aa tlak mi si nak hnga ding caah sifahnak le toidornak lungthin ngeih cu kan herh hrimhrim. Tukum Christmas cu zawtnak hrik le rungrul hna kar lak ah bawmtu ngei lo a chuah thar mi bawhte bangin vawlei pi nih a ton mi “hmelchunnak” pakhat a si ve(Lk 2:12).Kan hnu kum Greccio khua ah min ka rak thut mi cauk “An enchanting image” timi cauk kha a tu ah nan rel a si ah cun ka caah a tha ngaingai ko hnga.

Ka hawi le vialte hna, hi ka hmun i a um mi nan mah siseh, thil phun dang tampi ruangah hi ka hmun ah aa tel kho lo mi si hna seh; hi meifar thingkung le zuk a rak phortu/ tamhmoihnak lei in tlangtla tu hna le bawmhnak a petu hna nan dih lak cungah lunglawmhnak tampi ka ngei. Nan fim/thiam nak in nan i pekchanhnak cungah Pathian nih a let Thluachuah in pe hram ko hna seh. Ruahchannak tampi he Christmas caan tha nan hman khawh cio nak hnga thlaza kan campiak ko hna. Nan chungkhar cio hna le nan ram mi hna sinah thluachuah i tlun pi cio ko u. Nan dih lak in thlua kan chuah ko hna. Nan caah thla kan campiak hna lai ti cu aamah khannak bia kan chimh hna. Keimah ca zongah thla rak ka cam piak zungzal ve u. Lunglawmhnak Christmas si ko seh. Kaa lawm”.

Source: Vatican News