Pope Francis nih Myanmar ram caah thlacampiaknak a tuah

May 16, “Myanmar times- 2:30” kan Bawipa Jesuh Khrih vancung kainak puai Missa raithawi pekchanhnak thlacam pumh caan ah Pope Francis nih Myanmar ram daihnak caah thlacamnak a tuah.

Hi Missa raithawinak chungah hin Rome khua ah a um mi Kawlram Siangbawi, Brothers, Sisters hna le zumtu cheukhat hna zong an i tel kho ve.

Tu lio Myanmar ram chungah thil a cang cuahmah mi ram chung buaibainak hna ruangah, Myanmar Catholic Khrihfa hna nih Pope Francis sinah Missa thawinak nawl an hal i Pope nih Myanmar ram caah May 16 ni ah Missa raithawinak a tuah piak hna.

Hi pumhnak caan lio zongah Bible thiang relnak siseh, donghnak Pathian thangthatnak hla siseh, Kawl ca-holh in hman a si.

Pope Francis nih tu lio thil cang mi “hramhram in nawl laaknak, hremnak le thahnak hna chungah zumhfek tein dir ding, ruahchannak thlau lo ding le lungthin khat tein um zungzal dingin” Missa thawinak chungah forhfialnak bia a chim.

Lungkhahnak a hrawk cuahmah tu ral hna karlak hmanh ah, “chungkhar pakhat bangin pakhat le pakhat i dawt, i zohkhenh ding le lungkhat tein thil-dik, thil-hman caah fek tein dir khawh zungzal ding in” thazang peknak bia zong a chim.

A pehtthan mi cu “ Thil-dik lo mi hna chungah hin dai tein um lo ding, Daihnak le Bawipa thawngtha bia caah nunnak pek sian tiang in dirkamh ding le fakpi thlacamnak lei zong in thazang tthawn ding” caah a chimchap.

“Harsat-lungkuai, thlalau in kan um lio caan zongah kan Bawipa Jesuh Khrih nih Pa Pathian sinah thla a kan campiak zungzal ko” tiah phungchim lio caan ah a chim rih.

Ralkap nih nawl an chuh ni, February 1 in atu tiang ah hin Pope Francis nih Myanmar ram caah a voi(6)nak thlacam piaknak a tuah cang tiin Catholic Khrihfa hna nih an chim.

https://bit.ly/3uUYe6r