RVA THAWNGPANG TETE

Thawngpang tete >>>Youtube link >>>https://shorturl.at/ouBPU

Radio Veritas Asia (RVA Hakha Service) a ngaitu le a zohtu ulenau hna RVA in kutnem kanin tlaih hna. Pathian zaangfahnak thawngin nan damcio kolai tiah ruahchannak kan ngei.

Asiahcun thanh kan duhmi thawngpang ah kan kalchih lai. Abiapibik in thanh kan duhmi cu Hakha Diocese chungah 2023, October in December thla tiang abiapi mi program hna an si lai.

Kan program pawl cu: tukum 2023 i tlangbawi cannak tikcu le caan hna an si lai i, cuhlan ah deacon pawl he pehtlaimi kan chim hmasanak asi rih lai.

Tukum 2023 kum chungah tlangbawi cannak ordination a ngah dingmi deacon pawl cu;

1. Deacon Flavian Chum Er asi i amah hi Surkhua Parish, Lungtar khua in asi.
2. Deacon Paulinus Ghung Khui Shing asi i amah hi Cihkheh Parish, Mindatmyo in asi.
3. Deacon Peter Cung Hluan asi i amah hi Lumbang Parish, Kulzam khua in asi.
4. Deacon Pius Om Shing Ki asi i amah hi Sacred Heart Parish, Mindatmyo in asi.
5. Deacon Sixtus Thawng Uk asi i amah hi Zerua Parish, Ruava (B) in asi.

Deacon pawl i Ordination a tluangkhawhnak ding caah Pathian rianthiang `hatein an `uankhawhnak dingcaah thlacamnak in bawmhcio hna usih tiah sawm kan duh hna.

Asiahcun, atucu deacon hna i an program tete hna   kan thanhnak caan asi rih lai. Deacon pawl cu atu thla, October ni 18 ah retreat tuah dingin pastoral center, Hakha ah an umnak hmuncio hna in an phanh cio lai i October ni 19 zaan sml 8:00 pm in Retreat (daitein thlacamnak) an thok lai. Nili chung retreat an tuahnak ah thlarau lei hruaitu cu St. Joseph Cathedral, rector msr. Jerome Hlawn khawl asi lai. An retreat cu October 23 zaan ah an dih lai i October 24 zingka Missa raithawinak ah admission timi deacon pawl tlangbawi cannak ding caah cohlannak cu Bishop Lucius nih tuah asi lai.

Cun,

Atu cu an ordination ni le thla hna kan chimnak caan asi rih lai.

Acunglei i kan chimmi deacon hna i ordination ni le thla hna cu:

• October 26 ni cu Deacon Peter Cung Hluan i Ordination ni asi lai i ahmun cu Falam peng Lumbang parish, Kulzam khua ah asi lai. Hika zawnah thanhcih kan duhmi cu Kulzam khua in Bishop Lucius Hre Kung cu Kalay ah a kal lai i Kyiainn khua i new clergy house (hmun`hut um tlangbawi inn thar) thlauchuah peknak kha October 29 ni ah a tuah lai.
• November 18 ni cu Deacon Sixtus Thawng Uk i Ordination ni asi lai i ahmun cu Matupi peng, Rezua Parish, Ruava (B) khua ah asi lai.
• November 25 ni cu Deacon Paulinus Ghung Khui Shing le Deacon Pius Om Shing Ki hna i Ordination ni asi lai i ahmun cu Falammyo, Christ the King Church ah asi lai.

Hika zawnah thanhchih kan duhmi cu: Deacon pahnih hna i Ordination athai zing October 26 ni ah, Christ the king Church Biakinn tharpi thluachuah peknak a um lai. Cun, October 27 ni zingka Missa Raithawinak ah St. Joseph Sister hna i Falam an phanhnak kum (50) tlinh Jubilee Puai zong tuahchih asilai timi hna an si.

• December ni 8 cu Deacon Flavian Chum Er i Ordination ni asi lai i ahmun cu Hakha peng, Surkhua parish, Surkhuamyo ah asilai.

Atu i kan thawngpang cu hivial asi rih lai i “Like, comment le share” tuahcio dingah sawm kan duh hna. RVA Hakha Service thazaang a kan pe pengtu ulenau nan dihlak cungah lawmhnak tampi kan ngei tiah chim kan duh hna. Pathian nih in thluachuah cio ko hna seh.