THLA FATE THLACAMṬINAK

Monthly Recollection an tuah

Nihin March ni 9 ah, Hakha Zone um Tlangbawi pawl i nicheu chung Recollection (hun hngalhṭhannak) cu Tiphul Parish, Tiphul khua ah an tuah. Cu thlacamṭinak ah Bishop Lucius, Mgr. Jerome (St. Joseph’s Cathedral Rector), Fr. Abraham Hrang Hit (PP of Chuncung), Fr. Joseph Ro Nei Thang (Center), Fr. David Khin Hmung (PP of Tiphul), Fr. Lucas Ṭha Ling Sum (Center), Fr. Paul Kip Thawng (Center), Fr. Emmanuel Hrang Za Uk (Center), Fr. Dominic Sui Hmung (Center), Fr. Noel Hrang Tin Thang (Cathedral), Fr. William Ghung Ling (PP of Sakta), Fr. Anthony Ki Shing Mang (Cawbuk Minor), Deacon Daniel Gei Khui Shing (Cathedral) le Deacon Paulinus Ghung Khui Shing (Center) hna an i tel tiah theih asi.

Hi Recollection ah Bishop Lucius nih Biachimnak a ngei i a chimmi chung in lak kan duhmi cu atu hi Catholic Bupi nih synod tuah cuahmah lio pi asi i Tlangbawi hna le Khrihfa hna nih lungrual tein a dotsang niam thleihdannak umlo in rianṭuan ṭi ding caan a sicang tiah chungtel hna kha a cah hna. Cun, bishop nih bia biachim adih hnuah Tlangbawi pawl cu sualthahnak an tuah i sml 11:00 Am ah Tiphul khuanu khuapa hna caah siseh, Ramdang um ulenau hna caah siseh Missa Raithawi piaknak an tuah. Missa chung phungchimnak ah Msr. Jerome nih nihin bible cathiang relmi chungin a ruahnak a cheuh hna. Cucu Israel miphun pawl zonghi Jesuh Khrih chanlio ahcun an ram (Jerusalem) boruak hi a chiatuk caan asi bantukin atu kan ram zong hi caan ṭhlo caan asi caah Pathian nih a ṭha a timi in ra kan serpiak hram seh tiah thlacam peng hna u sih tiah chungtel pawl kha a sawm hna.

Cun Missa Raithawinak a dih tikah Tiphul khua in ramleng ummi hna nih hlut in sakmi HallKhan kha Bishop le Tlangbawi nih an zoh i aherh abau rihmi tete kha Bishop nih ruahcheuhnak a pek hna. Cudih ah  chungtel pawl cu chuncaw an ei i, a dih tikah March ni 20, St. Joseph puainipi i, Hakha Cathedral ah tuahding mi Ordination kong ceihmainak an ngei.

Meeting a dihin Tlangbawi pawl cu mah le umnak hmun cio ah an kirṭhan tiah RVA Hakha nih thawngpang kan theih.