Vawlei pumpi huap pi le pu hna (Tar pawl ni)puai ni cu July 25 ni ah tuah piak dingin fehternak an tuah

The Dicastery for the Laity, Family and Life zungpi nih a voikhat nak bik “Pi le Pu” hna puai ni caah an fehter mi tlangtar cu “Nan sinah a zungzal in ka um” timi in fehternak tlangtar an lak i thawng thanhnak an tuah.

Vawlei pumpi avoi(1) nak bik “Pi le Pu” hna puai cu July 25, 2021 Zarhpi Ni ah tuah dingin the Vatican Dicastery for the Laity, Family and Life zungpi nih cathanh a chuah.

Puai timhlamhnak ding caah Pope Francis nih tlangtar aa thim mi cu: “Nan sinah a zungzal in ka um lai”(Matt 28:20) timi hi a si. Hi tlangtar nih a langhter mi cu Bawipa kan pawngah a um zungzal nak le Bupi zong nih hi bantuk Covid-19 pulrai nih kan vawlei pi an tlunh lio caan zongah tar pawl kha hlaw loin le an mah hna he aa naih tein a um zungzal nak a si.

Hi tlangtar “Nan sinah a zungzal in ka um lai” timi hi mino pawl le tar pawl kar lak ah kapkhat le kapkhat i theithiam tein an um khawh nak hnga ding caah le i pehtlaihnak in ruah piak thiamnak lungthin an ngeih khawh deuh nak hnga ding ca zongah a si. Tu le fa hna le mino hna nih tar pawl he aa naih deuh in um pi thiam nak lawng si loin, tarpawl hna nih an nunnak in an rak ton cang mi hna fimnak lei in cheuhbauh ding tampi an ngei hna i mino pawl zong nih an mah hna sin in i cawn ding le i lak ding an si. Pi le pu hna le u pa cang mi hna zong nih mino hna le fale hna caah thlacam piak ding, Pathian bia cawnpiak ding rian an ngei ve i mino hna an zumhnak a feh chinchin khawhnak hnga ding ca zongah thazang pek ding le thlacampiak ding rian an ngei ve.

Hi puai tuahnak hnga ding caah mah umnak biakinn cio in siseh, phu cio in siseh, the Dicastery for Laity, Family and Life zungpi nih a herh ning in thazang peknak cabia langhter nak hna zong June thla cenceo in thok ding le kawl khawh nak hnga ding caah  www.amorislaetitia.va website in langhter a si fawn lai.