Sakta Parish nih Lourdes Bawinu Mary Biakinn Puai an tuah...

Biakinn hmai ah Khrihfa hna nuam tein an i chawnh biak lio.

Sakta Parish ah a voi (4) nak Lourdes Bawinu Mary Biakinn puai an tuah. Parish chung um Catholic Khrihfa hna zong an si khawh ning cio in an i tel hna. Sakta Parish Siangbawi Fr. James Ngun Uk hruai nak in puai tlamtling tein an tuah khawhnak hnga ding caah siseh, Parish chungin Pathian rian thiang a tuan tu an hmuh khawh nak hnga caah novena thlacamnak in timtuah nak an rak ngei.  Puai ah aa tel kho mi Khrihfa hna cu 150 leng an si. Puai ni ah Siangbawi (4) an i tel kho hna i Fr. Emmanuel Hrang Za Uk hruainak in Missa an thawk. Fr. Joseph Ro Nei Thang nih Pathian bia in a cawnpiak hna i Bawinu Mary Biakin puai a si bangin, Bupi cawnpiak nak i Bawinu Mary sin Rosary thlacam ning cang le Angelus thlacam ning cang hna zong fiang tein a chim.

"Zarhpi ni Rosary thlacam kan cam tik paohpaoh ah 'Sunparnak Biathuk hman ding a si. Angelus thla kan cam tik paohpaoh zongah dir ding a si" tiah a ti.

Fr. James Nung Uk nih: "a bik in hi puai kan tuah nak  sullam cu Sakta khua nih Pathian Thluachuah kan hmuh khawhnak hnga caah a si" tiah a ti.

Parish Saya Leo Sang Hnui nih a chim mi cu: "Kan Biakinn puai kan tuah hi a voi (4) nak a si cang. Puai kan tuah tikah kan Khrihfa bu chungin minung pakhatkhat nih a kan tuah piak tawn. Sihmahsehlaw, tutan cu Parish min in kan tuah mi a si bangin Parish bak nih a dih hnga ding mi vialte kan chuah" tiah a ti. Novena an tuah nak kong he pehtlai in Parish Saya pa nih a chim rih mi cu: " Novena kan tuah ni thawk in ni ruk a si hnu ah, ngandamnak Bawinu puai a si bantukin  kaa ruah lo mi thil khuaruahhar tete hi an hung um. Keimah ka chungkhar hrimhrim nih kan ton mi a si" tiah a chim fawn rih.

Khua chung um nu pakhat nih a chim ve mi cu: "Novena kan tuah paoh ah hin ramchung, ram leng um ka chungkhar hna caah thla ka cam peng. Bawinu Mary nih ka thlacam nak tlam a tlinter. Novena kan tuah lio zongah Siangbawi te le Saya hna nih Pathian bia a kan cawnpiak ah thazang tampi kan hmuh" tiah a ti.

Puai ni ah Bawipa Thisa chawhpi nak le Bawipa Thisa biaknak zong an tuah.

 

 

Comments

Pathian nih Sakta Parish i a ummi vialte thluachuah ko hna seh

Add new comment

17 + 0 =