Kan Thim Hna

Jesuh Khrih Zultu 12 hna le Chanthar Zultu hna

Nihin thawngṭha kan relmi chungah, kan Bawipa Jesuh nih a zultu hleihnih a thimnak kong kan theih. Jesuh nih, a mah sin i um awk ah le a khamhnak thawngṭha chim dingah a thim hna i khuachia khuavang ṭhawl khawhnak ṭhawnnak tiang in nan ngei lai tiah Mark 3:14-15 ah kan hmuh.

Jesuh nih thihnak in a tho i vancung ah a kai hnu ah zultu hna nih nifatin an nunnak ah an Saya a simi Jesuh he an rak umṭi i lu pek tiang in khamhnak thawngṭha zong an rak chim taktak. Khuachia an ṭhawl khawh, mi zaw an damter khawh i mithi thawhternak ṭhawnnak zong pek an rak si ko. Lamkaltu chan in hlan Khrihfa a chanchan in Khrih a cawnpiaknak a zumtu le a zultu hna cu Christian/ Jesuh Khrih zultu hna tiah vawlei cung ramkip ah zumtu Khrihfa kan um cang hna.

Jesuh Khrih hrimhrim nih a rak thimmi zultu 12 hna aiawhtu dirhmun ah nihin ah tlangbawi/ siangbawi, phungchimtu saya hna le pastor tiah, zultu 12 rian a simi Jesuh Khrih he umṭi awk ah le a thawngṭha bia kha chim awk ah ti in Khrihfa bu kip ah ṭuanvo le rank a phunphun he Pathian rianṭuantu tampi kan um cang hna.

Nihin ni ah Pathian rianṭuantu hna (Lamkultu Aiawh, tuukhal) hna le phungchimtu saya, pastor hna kan lungput le kan rianṭuan ning ah Bawipa he a umṭi, a ṭhu a dirṭi mi kan si maw? Thawngṭhabia maw kan phuan, vawlei thilri le theihhngalhnak kong dah kan phuan?

Pathian rianṭuantu hna kan nun ah Jesuh he a umṭi imJesuh muisam a langhtertu kan si maw? Khuachia khuavang a simi ṭhatlonak phunzakip he a khatmi kan vawlei ah kan dirhmun a fek maw?

Kan nunnak ah Bawipa he umṭi loin phung kan chim, thawngṭha kan aupi mi nih kan pawngkam ah le kan khua kan ram ah damnak maw a pek, rawhralnak le lungtuaitaamnak dah a pek timi ruah buin kan nunnak ah Bawipa he a ṭhu a dir i Thiang Thlarau lamhruainak le fim chimhnak tangah a nungmi kan si khawhnak Bawipa nih kan nun lam hruai hram ko seh.